ராயப்பேட்டை திருவிக சாலை என்று பரவும் புகைப்படம் உண்மையா?

1910ம் ஆண்டு எடுக்கப்பட்ட சென்னை ராயப்பேட்டை திருவிக சாலையின் புகைப்படம் என்று ஒரு படம் சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

தென்னந்தோப்பு நடுவே சாலை இருப்பது போன்று புகைப்படத்தை வைத்து பதிவு ஒன்றை உருவாக்கி ஃபேஸ்புக்கில் பதிவிட்டுள்ளனர். அதில், “கட்டிடங்கள் முளைக்காத பழைய ராயப்பேட்டை திருவிக சாலை! 1910ம் ஆண்டில் தென்னை மரங்கள் சூழ எழில்மிகு சென்னையின் மற்றொரு அரிதான தோற்றம் இது!” என்று குறிப்பிடப்பட்டிருந்தது. இந்த புகைப்படத்தை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

20ம் நூற்றாண்டின் தொடக்கத்தில் எடுக்கப்பட்ட சென்னை நகரின் புகைப்படங்கள் பல சமூக ஊடகங்களில் பகிரப்பட்டு வருகிறது. சென்னை தினக் கொண்டாட்டத்தின் போது அரசு மற்றும் தன்னார்வலர்கள் சிலர் சென்னையின் பழைய புகைப்படங்களைக் கண்காட்சிக்கு வைப்பார்கள். அதில் இதுவரை யாரும் வெளியிடாத புகைப்படத்தை தற்போது சென்னை ராயப்பேட்டை திருவிக சாலை என்று குறிப்பிட்டு பலரும் சமூக ஊடகங்களில் பகிர்ந்து வருகின்றனர். இது உண்மையா என்று அறிய ஆய்வு செய்தோம்.

உண்மைப் பதிவைக் காண: allposters.com I Archive

இந்த புகைப்படத்தை கூகுள் லென்ஸ் தளத்தில் பதிவேற்றித் தேடினோம். அப்போது இலங்கை தலைநகர் கொழும்புக்கு அருகே இந்த புகைப்படம் எடுக்கப்பட்டதாக பலரும் இந்த புகைப்படத்தை பதிவிட்டிருந்தனர். சில பழைய புகைப்படங்களை விற்பனை செய்யும் தளங்களும் கூட இந்த இடம் கொழும்புக்கு அருகே எடுக்கப்பட்டது என்று குறிப்பிட்டு விற்பனைக்கு வைத்திருந்தன.

உண்மைப் பதிவைக் காண: bridgemanimages.com I Archive

தொடர்ந்து தேடிய போது இது சென்னையில் எடுக்கப்பட்டது என்பதற்கு எந்த ஆதாரமும் கிடைக்கவில்லை. அதே நேரத்தில் முன்னணி புகைப்படங்கள் விற்பனை இணையதளமான bridgemanimages.com-ல் இந்த புகைப்படம் இலங்கைத் தலைநகர் கொழும்புக்கு அருகே எடுக்கப்பட்டது என்று குறிப்பிட்டு பதிவிடப்பட்டிருந்தது. இப்படி கிடைக்கும் ஆதாரங்கள் எல்லாமே இந்த புகைப்படம் இலங்கையில் எடுக்கப்பட்டது என்பதை உறுதி செய்யும் வகையிலேயே இருந்தன. சென்னை ராயப்பேட்டையில் எடுக்கப்பட்டது என்பதற்கு எந்த ஆதாரமும் கிடைக்கவில்லை. 

இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

இலங்கை தலைநகர் கொழும்பு அருகே எடுக்கப்பட்ட பழைய புகைப்படத்தை சென்னை ராயப்பேட்டை திரு.வி.க சாலையின் பழைய புகைப்படம் என்று தவறாக சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I X Post I Google News Channel I Instagram