முதலமைச்சர் மு.க.ஸ்டாலின் பதவி விலக வேண்டும் என்று ஆ.ராசா கருத்து கூறினாரா?

‘’முதலமைச்சர் மு.க.ஸ்டாலின் பதவி விலக வேண்டும்’’, என்று ஆ.ராசா கருத்து கூறியதாக, சமூக வலைதளங்களில் பகிரப்படும் ஒரு தகவல் பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’இப்ப தும்முன்னுதான் சரியா இருக்கும்.முதல்வருக்கு ஆ.டம்மி ராசா கேள்வி,’’ என்று எழுதப்பட்டுள்ளது. இதனுடன் ஆ.ராசா பேசும் வீடியோ ஒன்றும் இணைக்கப்பட்டுள்ளது. அந்த வீடியோவில், ‘’நான் குற்றம் சாட்டுகிறேன், உங்களது ஸ்டேட்மெண்ட் உளறல் உள்ளிட்டவற்றை கொண்டு கூறுகிறேன். நீங்கள் முதல்வராக இருப்பதற்கு எந்த தார்மீக அடிப்படை தகுதியும் கிடையாது,’’ என்று ஆ.ராசா பேசுகிறார்.

Claim Link 1 l Claim Link 2 l Claim Link 3

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

சமீபத்தில், சிவகங்கை மாவட்டம், திருபுவனம் அருகே உள்ள மடப்புரம் பத்ரகாளியம்மன் கோயிலில் காவலாளியாக பணிபுரிந்த அஜித்குமார் என்பவர், நகை திருட்டு புகாரின் பேரில், போலீசார் விசாரிக்கும்போது, உயிரிழந்ததாகப் புகார் எழுந்தது.

The New Indian Express l Frontline Magazine l The Hindu

இந்த விவகாரம் தமிழ்நாடு அரசியல் வட்டாரத்தில் பெரும் சர்ச்சையை ஏற்படுத்தியுள்ளது. தவிர, பொதுமக்கள் தரப்பிலும் போலீசார் மீது அதிருப்தி நிலவுகிறது. திமுக அரசை குற்றம்சாட்டி, பலவிதமான காரசார விமர்சனங்கள், சமூக வலைதளங்களிலும், ஊடக விவாதங்களிலும் முன்வைக்கப்படுகிறது.

The News Minute l Times Of India l India Today

இத்தகைய சூழலில், திமுக மூத்த தலைவர்களில் ஒருவரான ஆ.ராசா, முதலமைச்சர் பதவியில் இருந்து மு.க.ஸ்டாலின் பதவி விலகக் கூறியதாகக் குறிப்பிட்டு, சிலர் ஒரு வீடியோவை சமூக வலைதளங்களில் பகிர்ந்து வருகின்றனர்.

ஆனால், இந்த வீடியோ தற்போது வெளியானதல்ல; இது கடந்த 2020ம் ஆண்டு சாத்தான்குளம் காவல் நிலையத்தில் நிகழ்ந்த ஜெயராஜ் – பென்னிக்ஸ் லாக்கப் மரணம் தொடர்பாக ஆ.ராசா Behindwoods Air ஊடகத்திற்கு அளித்த பேட்டி. அப்போது, எடப்பாடி பழனிசாமி தலைமையிலான அதிமுக அரசு ஆட்சியில் இருந்தது. எனவே, எடப்பாடி பழனிசாமி பதவி விலக வேண்டும் என்று வலியுறுத்தி, ஆ.ராசா அந்த பேட்டியில் கருத்து கூறியிருந்தார். இதனை எடுத்து, தற்போதைய அரசியல் சூழலுடன் தொடர்புபடுத்தி, வதந்தி பரப்புகிறார்கள் என்று தெளிவாகிறது.

முழு வீடியோ லிங்க் கீழே தரப்பட்டுள்ளது.

இதுதொடர்பாக, ஆ.ராசா அலுவலகத்திலும் பேசி உறுதிப்படுத்தியுள்ளோம். எனவே, நாம் ஆய்வுக்கு எடுத்துக் கொண்ட வீடியோவுக்கும், தற்போதைய தமிழக அரசியல் சூழலுக்கும் எந்த தொடர்பும் இல்லை, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.