“லடாக் பாஜக அலுவலகத்தை எரித்த நபர் கைது” என்று பரவும் வீடியோ உண்மையா?

லடாக்கில் பாஜக அலுவலகத்தை எரித்த இஸ்லாமியர் கைது செய்யப்பட்டதாக ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

இஸ்லாமியர் ஒருவரை போலீசார் கைது செய்து அழைத்துச் செல்லும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “லடாக் யூனியன் பிரதேச பாஜக அலுவலகத்தில் தீ வைத்த மர்ம நபர் கைது…👌

அடேய் பப்பு பப்பிமா & இத்தாலி பார் டான்சர் உங்கள் கனவு பலிக்காது…” என்று குறிப்பிடப்பட்டிருந்தது. இந்த பதிவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

சில ஆண்டுகளுக்கு முன்பு தனி யூனியன் பிரதேசமாக பிரிக்கப்பட்ட லடாக்குக்கு மாநில அந்தஸ்து அளிக்கக் கோரி போராட்டம் நடந்தது. இதில் லடாக் மாநில பாஜக அலுவலகம் எரிக்கப்பட்டது. இதை செய்தது காங்கிரஸ் மற்றும் இஸ்லாமியர்கள்தான் என்பது போல வீடியோ ஃபேஸ்புக்கில் பதிவிடப்பட்டுள்ளது. வீடியோவில் உள்ளவர்களைப் பார்க்கும் போது லடாக் மக்கள் போல இல்லை. எனவே, இந்த வீடியோ தொடர்பாக ஆய்வு செய்தோம்.

வீடியோ காட்சியைப் புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது இந்த வீடியோவை சமீப நாட்களாகத்தான் பலரும் சமூக ஊடகங்களில் பதிவிட்டு வந்திருந்ததைக் காண முடிந்தது. அதில், உத்திரகாண்ட் மாநிலம் காசிப்பூரில் “ஐ லவ் முகமது” பேரணியைத் தொடர்ந்து ஏற்பட்ட வன்முறைக்குக் காரணம் என்று கூறி கைது செய்யப்பட்ட நபர்களுள் ஒருவரான நதீம் அக்தர்” என்று குறிப்பிடப்பட்டிருந்தது. இது தொடர்பாக பல பதிவுகள் மட்டுமே கிடைத்தன.

உண்மைப் பதிவைக் காண: instagram.com I Archive

அதே நேரத்தில் வன்முறைக்குக் காரணமானவர்கள் கைது என்று வெளியான பல செய்திகள் நமக்கு கிடைத்தன. ஆனால், இந்த நபர் லடாக் பாஜக அலுவலகம் எரிப்பு தொடர்பாக கைது செய்யப்பட்டவர் என்று எந்த செய்தியும் கிடைக்கவில்லை.

நாம் ஆய்வுக்கு எடுத்துக்கொண்ட வீடியோவில் காவல் நிலையத்தின் பெயர்ப் பலகையைக் காண முடிந்தது. அதை கூகுள் லென்ஸ் மூலம் மொழிபெயர்த்துப் பார்த்தோம். காசிபூர் (Kashipur), உத்தம்சிங் நகர், உத்தரகாண்ட் என்று இருந்தது. இவை எல்லாம் இந்த நபர் உத்தரகாண்டில் வன்முறை சம்பவம் தொடர்பாக கைது செய்யப்பட்டவர் என்பதை உறுதி செய்தன.

முடிவு:

உத்தரகாண்டில் வன்முறை சம்பவம் தொடர்பாக கைது செய்யப்பட்ட நபரின் வீடியோவை, லடாக்கி்ல பாஜக அலுவலகத்தை எரித்த மர்ம நபர் கைது என்று தவறாக சமூக ஊடகங்களில் பகிர்ந்திருப்பதைத் தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.