RAPID FACT CHECK: குஜராத் சாலை என்று பகிரப்படும் பெங்களூரு வீடியோ!

குஜராத்தில் உள்ள சாலையில் விண்வெளி வீரர் போல ஒருவர் உடை அணிந்து நடந்து சென்றதாக வீடியோ ஒன்று சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பெங்களூருவில் சில ஆண்டுகளுக்கு முன்பு சாலையில் மேடும் பள்ளமுமாக இருப்பதைக் காட்ட விண்வெளி வீரர் போல ஒருவர் உடை அணிந்து நிலாவில் நடப்பது போன்று நடந்து காட்டிய வீடியோவை எடிட் செய்து ஃபேஸ்புக்கில் பகிர்ந்துள்ளனர். வீடியோவில், “குஜராத் ஒரு செகண்ட் நம்பிட்டேன்டா Gujarat” என்று டைப் செய்யப்பட்டிருந்தது. இதை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

சில ஆண்டுகளுக்கு முன்பு கர்நாடக மாநிலம் பெங்களூருவில் உள்ள சாலையின் மோசமான நிலையைப் பற்றி பெங்களூரு மாநகராட்சி ஆணையருக்கு விளக்க வீடியோ ஒன்றை ஒருவர் வெளியிட்டது பரபரப்பை ஏற்படுத்தியது. குண்டும் குழியுமான சாலையில் விண்வெளி வீரர் போல உடை அணிந்து நிலவில் நடப்பது போன்று நடந்து அதை வீடியோ எடுத்து அவர் சமூக ஊடகங்களில் வெளியிட்டார். 

இந்த வீடியோவை சில மாதங்களுக்கு முன்பு நம் ஊர் நெட்டிசன்கள் சிலர் கோயமுத்தூர் குனியமுத்தூர் சாலை என்று மாற்றி சமூக ஊடகங்களில் பரப்பினர். அப்போது இது தொடர்பாக ஆய்வு செய்து இந்த வீடியோ தமிழகத்தைச் சார்ந்தது இல்லை, கர்நாடகத்தைச் சார்ந்தது என்று ஆய்வுக் கட்டுரை வெளியிட்டிருந்தோம். அந்த கட்டுரையைக் காண இங்கே கிளிக் செய்யுங்கள்.

தற்போது அந்த வீடியோவை குஜராத்தில் எடுக்கப்பட்டது என்று சிலர் சமூக ஊடகங்களில் பகிர்ந்து வருகின்றனர். ஏற்கவே, இந்த வீடியோ தமிழகத்தைச் சார்ந்தது இல்லை பெங்களூருவைச் சார்ந்தது என்று உறுதி செய்து கட்டுரை வெளியிட்டிருந்தாலும், தற்போது குஜராத் என்று குறிப்பிட்டு வதந்தி பரவுவதால் விரைவு ஆய்வை செய்தோம்.

Hello bbmp👋 @BBMPCOMM @BBMP_MAYOR @bbm #thelatest #streetart #nammabengaluru #herohalli pic.twitter.com/hsizngTpRH

— baadal nanjundaswamy (@baadalvirus) September 2, 2019

Archive

முதலில் அந்த உண்மையான வீடியோவை தேடி எடுத்தோம். baadal nanjundaswamy @baadalvirus என்ற ட்விட்டர் (எக்ஸ் தளம்) ஐடி-யில் 2019ம் ஆண்டு செப்டம்பர் 2ம் தேதி இந்த வீடியோ பதிவிடப்பட்டிருந்தது. பெங்களூரு மாநகராட்சி ஆணையரை டேக் செய்து இந்த வீடியோவை அவர் வெளியிட்டிருந்தார்.

உண்மைப் பதிவைக் காண: indianexpress.com I Archive

அடுத்ததாக இந்த வீடியோ தொடர்பாக வெளியான செய்திகள், செய்தி ஊடகங்களில் வெளியான காணொளிகளைத் தேடி எடுத்தோம். இந்தியன் எக்ஸ்பிரஸ் வெளியிட்டிருந்த செய்தியில் பெங்களூருவில் எங்கு, எதற்காக இப்படி வீடியோ எடுத்து சமூக ஊடகங்களில் வெளியிடப்பட்டது என்று விரிவாகக் கட்டுரை வெளியிட்டிருந்தனர். இந்த கட்டுரை 2019ம் ஆண்டு செப்டம்பர் 2ம் தேதி வெளியிடப்பட்டிருந்தது. இவை எல்லாம் இந்த வீடியோ குஜராத்தைச் சார்ந்தது இல்லை என்பதை உறுதி செய்கின்றன. இதன் அடிப்படையில் நாம் ஆய்வுக்கு எடுத்துக்கொண்ட ஃபேஸ்புக் பதிவு தவறானது என்று உறுதி செய்யப்படுகிறது.

முடிவு:

குண்டும் குழியுமாக உள்ள குஜராத்தின் சாலையில் மூன்வாக் செய்த நபர் என்று பரவும் வீடியோ 2019ல் பெங்களூருவில் எடுக்கப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel