FactCheck: ஒரு டிக்கெட் விலை ரூ.2925?- அண்ணாத்த படம் பற்றி பகிரப்படும் வதந்தி…

‘’அண்ணாத்த திரைப்படத்தின் ஒரு டிக்கெட் விலை ரூ.2925,’’ என்று சமூக வலைதளங்களில் பகிரப்படும் தகவல் ஒன்றின் நம்பகத்தன்மை பற்றி ஆய்வு செய்தோம்.

தகவலின் விவரம்:

ரஜினிகாந்த் நடித்துள்ள புதிய படம் ‘அண்ணாத்த’. இதன் ஒரு டிக்கெட் விலை ரூ.2925 எனக் குறிப்பிட்டுள்ளனர். இதனை வாசகர் ஒருவர் +91 9049053770 என்ற நமது வாட்ஸ்ஆப் சாட்போட் எண்ணிற்கு அனுப்பி உண்மையா எனக் கேட்டிருந்தார்.

Facebook Claim Link I Archived Link 

உண்மை அறிவோம்:
இதன்பேரில், நாமும் ஃபேஸ்புக்கில் தகவல் தேடியபோது, பலரும் இதனை உண்மை என நம்பி, விதவிதமாக எடிட் செய்த புகைப்படங்களை பகிர்வதைக் கண்டோம்.

இதன்படி, சிலர் Kasi Talkies என்பதை மறைத்தும், Admit 15 என்று உள்ளதை, 1 என்று எடிட் செய்தும் தகவல் பகிர்கின்றனர். மேலும் சிலர், Admit 15 என்பதை, தவறாகப் புரிந்துகொண்டு, ஒரு டிக்கெட் விலை இவ்வளவு, என்றும் ஃபேஸ்புக்கில் தகவல் பகிர்வதைக் கண்டோம்.

ரஜினிகாந்த் நடித்துள்ள அண்ணாத்த படம், தீபாவளி 2021 முன்னிட்டு ரிலீஸ் செய்யப்படுகிறது. இதையொட்டி, படத்திற்கான முன்பதிவும் தொடங்கியுள்ளது. இந்த படத்தை சன் பிக்சர்ஸ் தயாரித்துள்ள நிலையில், உதயநிதி ஸ்டாலினுக்குச் சொந்தமான ரெட் ஜெயண்ட் மூவிஸ் நிறுவனம் வெளியிடுகிறது.

இதனை விமர்சிக்கும் வகையில், டிக்கெட்டில் Admit 15 என குறிப்பிட்டுள்ளதை, சரியாகப் புரிந்துகொள்ளாமல், இயக்குனர் மு.களஞ்சியம், ஒரு டிக்கெட் விலை ரூ.2925 என விமர்சித்து, அவரது சமூக வலைதள பக்கத்தில் பகிர்ந்திருந்தார். அதுதான் மேற்கண்ட வகையில் சர்ச்சை பரவ காரணமாகும். பின்னர் தவறை உணர்ந்து, அந்த ட்வீட்டை மு.களஞ்சியம் நீக்கிவிட்டார்.

Dinamani Link

உண்மையான டிக்கெட்டின் புகைப்படத்தை, வாசகர் ஒருவர், நமது வாட்ஸ்ஆப் எண்ணிற்கு, அனுப்பி வைத்திருந்தார். அதனையும் கீழே ஆதாரத்திற்காக இணைத்துள்ளோம்.

எனவே, சென்னையில் உள்ள காசி டாக்கீஸில் ஒரு டிக்கெட் விலை குறைந்தபட்சம் ரூ.10 முதல், அதிகபட்சம் ரூ.200 வரை விற்கப்படுவதாக, இணையதளம் வழியாக, தெரியவருகிறது.

இதுதவிர, Admit 15 என்பதை தவறாக புரிந்துகொண்டும், சிலர் அதனை வேண்டுமென்றே எடிட் செய்து, ஒரு டிக்கெட் விலை ரூ.2925 என்று உள்நோக்கத்துடன் வதந்தி பரப்பி வருவதாக, சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் நாம் ஆய்வு மேற்கொண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம். 

எங்களது சமூக வலைதள பக்கங்களை பின்தொடர…

Facebook Page I Twitter Page I Google News Channel