தி.மு.க ஆட்சியில் போலீஸ் – பொது மக்கள் மோதல் என்று பரவும் வீடியோ உண்மையா?

தி.மு.க ஆட்சியில் போலீசும் பொது மக்களும் மோதிக்கொள்கின்றனர், மக்களுக்கு பாதுகாப்பு இல்லை என்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

போக்குவரத்து காவல் உதவி ஆய்வாளரை மக்கள் சிலர் ஒன்று திரண்டு தாக்கும் வீடியோ ஃபேஸ்புக்கில் பகிரப்பட்டுள்ளது. நிலைத் தகவலில், “எங்க நடந்துச்சு ன்னு தெரியல… #விடியா_திமுகமாடல் அரசு ஆளும் தமிழ்நாடு தான்

யாருக்குமே #பாதுகாப்பில்லாத_தமிழ்நாடு” என்று குறிப்பிடப்பட்டிருந்தது. நாம் ஆய்வுக்கு எடுத்துக்கொண்ட பதிவானது ஃபேஸ்புக்கில் 2023 நவம்பர் 22ம் தேதி பதிவிடப்பட்டிருந்தது.

உண்மை அறிவோம்:

தி.மு.க ஆட்சியில் பொது மக்களுக்கு பாதுகாப்பு இல்லை, பாதுகாப்பு இல்லாத தமிழ்நாடு என்றெல்லாம் ஹேஷ் டேக்கை பயன்படுத்தி அ.தி.மு.க மற்றும் பா.ஜ.க ஆதரவாளர்கள் சமூக ஊடகங்களில் சில வீடியோக்களை பதிவிட்டு வருகின்றனர். நாம் ஆய்வுக்கு எடுத்துக்கொண்ட வீடியோ சில ஆண்டுகளுக்கு முன்பு வைரலான ஒன்று என நினைவில் இருந்ததால் இது பற்றி ஆய்வு செய்தோம்.

வீடியோவை புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது 2018ம் ஆண்டு மார்ச் 22ம் தேதி இந்த வீடியோவை NewsGlitz Tamil என்ற யூடியூப் பக்கம் பதிவிட்டிருந்தது தெரிந்தது. 

“காசு கேட்ட போலீசை விரட்டிய மக்கள்” என்று தலைப்பிட்டு சென்னை வேளச்சேரியில் நடந்தது என்று குறிப்பிட்டிருந்தனர். 2018 என்பது எடப்பாடி பழனிசாமி தலைமையிலான அதிமுக அரசு தமிழ்நாட்டில் ஆட்சி செய்த காலம் ஆகும். 2021 மே மாதம் தான் தி.மு.க ஆட்சிக்கு வந்தது. தங்கள் கட்சி ஆட்சி செய்த போது எடுக்கப்பட்ட வீடியோ என்று கூட அறியாமல் அ.தி.மு.க-வினர் இதை சமூக ஊடகங்களில் பதிவிட்டு வருவது உறுதியானது. இதன் அடிப்படையில் இந்த வீடியோவுக்கும் தி.மு.க ஆட்சிக்கும் தொடர்பில்லை என்பது உறுதி செய்யப்படுகிறது.

முடிவு:

திமுக ஆட்சியில் மக்களுக்கு பாதுகாப்பில்லை என்று பரவும் வீடியோ 2018ம் ஆண்டு அதிமுக ஆட்சிக் காலத்தில் எடுக்கப்பட்டது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel