ஈரோட்டில் திமுகவினரை ஊருக்குள் நுழைய விடாமல் தடுத்த மக்கள் என்று பரவும் வீடியோ உண்மையா?

‘’ ஈரோட்டில் திமுகவினரை ஊருக்குள் நுழைய விடாமல் தடுத்த பொதுமக்கள்’’, என்று கூறி, சமூக வலைதளங்களில் பகிரப்படும் ஒரு வீடியோ பற்றி ஆய்வு மேற்கொண்டோம்.

தகவலின் விவரம்:

இதனை வாசகர்கள் நமக்கு வாட்ஸ்ஆப் சாட்போட் (+919049053770) வழியே அனுப்பி, உண்மையா என்று சந்தேகம் கேட்டனர்.

இதில், ‘’ஈரோட்டில் செருப்படி வாங்கிய திமுக..

ஆட்சியில் இருந்து திருடுவதை தவிர வேறு எந்த வேலையும் செய்யாத திமுகவை விரட்டியடித்த பொதுமக்கள்..

#ErodeEastByElection #DMKFailsTN,’’ என்று எழுதப்பட்டுள்ளது.

Claim Link 1 l Claim Link 2

பலரும் இதனை உண்மை என நம்பி, சமூக வலைதளங்களில் ஷேர், கமெண்ட் செய்து வருகின்றனர்.

உண்மை அறிவோம்:

மேற்கண்ட வீடியோ தற்போது எடுக்கப்பட்டதா, என்று நாம் ஆய்வு மேற்கொண்டோம். அப்போது, இதற்கும், ஈரோடு கிழக்கு சட்டமன்ற தொகுதி இடைத்தேர்தலுக்கும் எந்த தொடர்பும் இல்லை என்று தெரியவந்தது.

ஆம், வீடியோவில் இடம்பெற்றுள்ள காட்சி ஒன்றில் திமுக பிரசார வாகனத்தின் மீது கு. பிச்சாண்டி MA. MLA என்று எழுதப்பட்டுள்ளதைக் கண்டோம்.

தற்போது கீழ்பெண்ணாத்தூர் சட்டமன்ற தொகுதி திமுக எம்எல்ஏ மற்றும் சட்டப்பேரவை துணைத் தலைவராகவும் கு.பிச்சாண்டி உள்ளார். இவர், கடந்த 2024ம் ஆண்டு நடைபெற்ற மக்களவைத் தேர்தலின்போது, திருவண்ணாமலை நாடாளுமன்றத் தொகுதியில் போட்டியிட்ட சி.என்.அண்ணாதுரையை ஆதரித்து வாக்கு சேகரிப்பில் ஈடுபட்டார். அப்போது, ஏப்ரல் 06, 2024 அன்று கீழ்பெண்ணாத்தூர் தாலுகாவில் உள்ள செல்லங்குப்பம் கிராமத்தில் கு.பிச்சாண்டி சென்ற காரை வழிமறித்து, பொதுமக்கள் வாக்குவாதத்தில் ஈடுபட்டனர். இதுதொடர்பான வீடியோவை எடுத்து, தற்போதைய ஈரோடு கிழக்கு சட்டமன்ற தொகுதி இடைத்தேர்தலுடன் தொடர்புபடுத்தி வதந்தி பரப்புகிறார்கள்.

கூடுதல் செய்தி ஆதாரம் இதோ…

Dinamalar Link l ETV Bharat Link

எனவே, நாம் ஆய்வுக்கு எடுத்துக் கொண்ட வீடியோவுக்கும், ஈரோடு கிழக்கு சட்டமன்ற தொகுதி இடைத்தேர்தலுக்கும் எந்த தொடர்பும் இல்லை, என்று சந்தேகமின்றி உறுதி செய்யப்படுகிறது.

முடிவு:

உரிய ஆதாரங்களின் அடிப்படையில் மேற்கண்ட தகவல் நம்பகமானது இல்லை என்று ஃபேக்ட் கிரஸண்டோ தமிழ் நிரூபித்துள்ளது. நமது வாசகர்கள் இத்தகைய தவறான செய்தி, புகைப்படம் மற்றும் வீடியோவை கண்டால், எங்களது வாட்ஸ் ஆப் எண்ணிற்கு (+91 9049053770) அனுப்புங்கள். நாங்கள், அதுபற்றி ஆய்வு செய்து உண்மை விவரத்தை வெளியிடுகிறோம்.

எங்களது சமூக வலைதள பக்கங்களை பின்தொடர…

Facebook Page I Twitter Page I Google News Channel I Instagram