இந்தியாவுக்குள் புர்கா அணிந்தும், வெளிநாடு சென்றால் அரைகுறை ஆடையுடனும் ஏ.ஆர்.ரஹ்மான் மகள் கதீஜா இருக்கிறார் என்று பதிவு சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
இரண்டு புகைப்படங்களை ஒன்று சேர்த்து புகைப்பட பதிவு உருவாக்கப்பட்டுள்ளது. முதல் படத்தில் ஏ.ஆர்.ரஹ்மான் தன்னுடைய மகளுடன் இருக்கும் புகைப்படம் உள்ளது. அந்த படத்திற்குள் “உள்நாட்டு கதீஜா” என்றும் அதற்குக் கீழ், “இந்தியாவுக்குள் மட்டும் புர்கா அணிந்து தன்னிறைவு அடைந்தபோது…” என்று இருந்தது.
அடுத்த படத்தில் மார்டன் டிரெஸ் அணிந்திருக்கும் பெண்ணின் புகைப்படம் உள்ளது. அதன் மீது “ளெிநாட்டு கதீஜா” என்றும், அதன் கீழ், “வெளிநாட்டில் கும்ததா.. எங்க பாப்பா அந்த கருப்பு கோணி சாக்கு?” என்று போட்டோஷாப் முறையில் எழுதப்பட்டிருந்தது.
மேலும், “புர்கா அணிவதால் தன்னிறைவு அடைகிறேன் … கதீஜா… ஏ ஆர் ரெஹ்மான் மகள் …” என்று குறிப்பிடப்பட்டிருந்தது. இந்த பதிவை Babu Babuji என்ற ஃபேஸ்புக் ஐடி கொண்ட நபர் 2022 பிப்ரவரி 18ம் தேதி பதிவிட்டுள்ளார். இவரைப் போல பலரும் இந்த படத்தைப் பகிர்ந்து வருகின்றனர்.
உண்மை அறிவோம்:
கர்நாடகத்தில் புர்கா அணிந்து வந்த பள்ளி, கல்லூரி மாணவிகளைக் கல்வி நிலையங்களுக்குள் அனுமதிக்க மறுத்தது சர்ச்சையை ஏற்படுத்தியது. இந்த நிலையில் ஏ.ஆர்.ரஹ்மான் மகள் கதீஜா, இந்தியாவுக்குள் புர்கா அணிந்தும், வெளிநாட்டுக்குச் சென்றால் அரைகுறை ஆடை அணிவதுமாக இருக்கிறார் என்று ஒரு புகைப்பட பதிவு சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.
ஏ.ஆர்.ரஹ்மான் மகள் புர்கா அணிவது தனக்கு தன்னிறைவைத் தருகிறது என்று சில ஆண்டுகளுக்கு முன்பு கூறியிருந்தார். புர்கா அணிந்த புகைப்படங்கள் மட்டுமே இதுவரை வெளியாகி உள்ளது. அவர் வெளிநாட்டில் புர்கா அணியாமல் இருந்ததாக எந்த படமும் இல்லை. எனவே, இந்த படத்தை ரிவர்ஸ் இமேஜ் தேடலில் பதிவேற்றித் தேடினோம். அப்போது, இது பிரபல எழுத்தாளர் தஸ்லிமா நஸ்ரின் புகைப்படம் என்று தெரியவந்தது.
இந்த புகைப்படத்தை தஸ்லிமா நஸ்ரின் 2013ம் ஆண்டு ட்விட்டரில் வெளியிட்டிருந்தார். அதில், “நியூயார்க் நகரில் உள்ள இந்தியத் தூதரகத்துக்கு வெளியே இந்திய வீசா கிடைக்கும் என்ற நம்பிக்கையில் இருக்கிறேன்” என்று குறிப்பிட்டிருந்தார்.
தொடர்ந்து தேடிய போது புர்கா அணிவது பற்றி 2020ம் ஆண்டு ஏ.ஆர்.ரஹ்மான் மகள் கருத்து தெரிவித்தது தொடர்பான செய்தியில் இந்த படத்தை வைத்திருப்பது தெரிந்தது, பிரபல எழுத்தாளர் தஸ்லிமா நஸ்ரின் ஏ.ஆர்.ரஹ்மான் மகள் புர்கா அணிவது தொடர்பாக ட்விட்டரில் பதிவிட்டிருந்தார். அதற்கு கதீஜா தன்னுடைய இன்ஸ்டாகிராமில் பதில் கொடுத்திருந்தார். அப்போது, அவர்கள் இருவரின் புகைப்படத்தையும் ஒன்றாக வைத்து செய்திகள் வெளியாகி இருந்தது தெரிந்தது. படத்தை எடுத்தவர்கள், என்ன செய்தி என்று படித்திருந்தால் இந்த குழப்பம் வந்திருக்காது.
நம்முடைய ஆய்வில், வெளிநாட்டில் ஏ.ஆர்.ரஹ்மான் மகள் கதீஜா எடுத்துக்கொண்ட புகைப்படம் என்று பகிரப்படும் படம் பிரபல எழுத்தாளர் தஸ்லிமா நஸ்ரினுடையது என்பது உறுதி செய்யப்பட்டுள்ளது. இந்த ஆதாரங்கள் அடிப்படையில், நாம் ஆய்வுக்கு எடுத்துக்கொண்ட பதிவு தவறானது, விஷமத்தனமானது என்று உறுதி செய்யப்படுகிறது.
முடிவு:
எழுத்தாளர் தஸ்லிமா படத்தை ஏ.ஆர்.ரஹ்மான் மகள் கதீஜா என்று தவறாக குறிப்பிட்டு சமூக ஊடகங்களில் பகிர்ந்து வருவதை தகுந்த ஆதாரங்களுடன் ஃபேக்ட் கிரஸண்டோ உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I Twitter I Google News Channel
Title:வெளிநாட்டில் அரைகுறை ஆடையுடன் ஏ.ஆர்.ரஹ்மான் மகள் என்று பரவும் தஸ்லிமா நஸ்ரின் புகைப்படம்!
Fact Check By: Chendur PandianResult: False
