ரஷ்யாவை தாக்கிய சுனாமி என்று பரவும் வீடியோ உண்மையா?

ரஷ்யாவை சுனாமி தாக்கியதாக ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

கடற்கரை ஒன்றை சுனாமி போன்று பெரிய அலை தாக்கும் வீடியோ ஃபேஸ்புக்கில் பதிவிடப்பட்டுள்ளது. நிலைத் தகவலில், “ரஷ்யா சுனாமி” என்று குறிப்பிடப்பட்டிருந்தது. இந்த வீடியோவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

2025 ஜூன் 30ம் தேதி ரஷ்யாவில் மிக பயங்கரமான நிலநடுக்கம் ஏற்பட்டது. இதைத் தொடர்ந்து ரஷ்யா, ஜப்பான் உள்ளிட்ட பல நாடுகளுக்கு சுனாமி எச்சரிக்கை விடுக்கப்பட்டது. ரஷ்ய கிழக்குப் பகுதி கடற்கரையில் சுனாமி தாக்கியதாக செய்திகள் வந்துகொண்டே இருக்கின்றன.

இந்த சூழலில், ரஷ்ய சுனாமி என்று பலவீடியோக்கள் சமூக ஊடகங்களில் வைரலாக பகிரப்பட்டு வருகிறது. அப்படி சமூக ஊடகங்களில் பரவி வரும் ஒரு வீடியோக்களை ஆய்வு செய்து வருகிறோம். அதில், நாம் ஆய்வுக்கு எடுத்துக்கொண்ட வீடியோ தவறானது என்பது தெரியவந்தது.

இந்த வீடியோவை புகைப்படங்களாக மாற்றி கூகுள் லென்ஸ் தளத்தில் பதிவேற்றித் தேடினோம். அப்போது, துருக்கியில் ஏற்பட்ட சுனாமி என்று இதே வீடியோவை சில ஆண்டுகளுக்கு முன்பு சமூக ஊடகங்களில் பதிவிடப்பட்டிருந்ததைக் காண முடிந்தது. அதற்கும் முன்பாக தென்னாப்பிரிக்காவின் டர்பன் கடற்கரையை ராட்சத அலை தாக்கியதாக நியூயார்க் டைம்ஸ் உள்ளிட்ட ஊடகங்களில் இந்த வீடியோ காட்சியுடன் செய்தி வெளியாகி இருந்ததையும் காண முடிந்தது.

இதில் எது உண்மை என்று தொடர்ந்து தேடிய போது, டர்பன் கடற்கரையில் ராட்சத அலை 2017ம் தாக்கியதாக செய்திகள் கிடைத்தன. எனவே, துருக்கியில் சுனாமி என்று பரவும் வீடியோ தகவலும் தவறானது என்பது தெரியவந்தது. துருக்கியில் சுனாமி தாக்கியதாக 2023ம் ஆண்டில் இதே வீடியோவை பதிவிட்டிருந்தனர். ஆனால், டர்பன் கடற்கரையில் ராட்சத அலை ஏற்பட்டதாக 2017ம் ஆண்டு செய்தி வெளியாகி இருந்தது. ஏஎஃப்பி (AFP) செய்தி நிறுவனம் கூட இது தொடர்பாக 2023ம் ஆண்டில் ஃபேக்ட் செக் கட்டுரை வெளியிட்டிருந்ததும் தெரியவந்தது.

தொடர்ந்து தேடிய போது, 2017ம் ஆண்டு மார்ச் 13ம் தேதி நாம் ஆய்வுக்கு எடுத்துக்கொண்ட அதே வீடியோவை ஒருவர் யூடியூபில் பதிவிட்டிருந்ததைக் கண்டறிந்தோம். அதில், 2017 மார்ச் 12ம் தேதி டர்பன் கடற்கரையை மிகப்பெரிய அலை தாக்கியது என்று குறிப்பிட்டிருந்தார். இவை எல்லாம் நாம் ஆய்வுக்கு எடுத்துக்கொண்ட வீடியோ 2025 ஜூலை 30ம் தேதி ரஷ்யாவை சுனாமி தாக்கிய காட்சி இல்லை என்பதை உறுதி செய்தன.

முடிவு:

2017ம் ஆண்டு தென்னாப்பிரிக்காவின் டர்பன் கடற்கரையில் ராட்சத அலைகள் தாக்கிய வீடியோவை ரஷ்யாவை சுனாமி தாக்கியது என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.