பி.வி. சிந்து ஒலிம்பிக்கில் இரண்டு தங்கப் பதக்கம் வென்றாரா?

தகவலின் விவரம்:

உண்மைப் பதிவைக் காண: Facebook I Archive

இந்திய பேட்மிண்டன் வீராங்கனை பி.வி.சிந்து புகைப்படத்துடன் நியூஸ் கார்டு ஒன்று ஃபேஸ்புக்கில் பதிவிடப்பட்டுள்ளது. அதில், "இந்தியாவிற்காக இரண்டு முறை ஒலிம்பிக்கில் தங்கம் வென்று அசத்திய பிவி சிந்து வாழ்த்தி மகிழலாமே" என்று குறிப்பிடப்பட்டிருந்தது. இந்த பதிவை பலரும் சமூக ஊடகங்களில் பகிர்ந்து வருகின்றனர்.

உண்மை அறிவோம்:

பேட்மிண்டன் வீராங்கனை பி.வி.சிந்து ஒலிம்பிக்ஸ் போட்டியில் இரண்டு முறை பதக்கம் வென்றார். முதல் முறை வெள்ளியும் இரண்டாவது முறை வெண்கலமும் வென்றார். சமீபத்தில் முடிந்த பாரீஸ் ஒலிம்பிக் போட்டியில் பதக்கம் வெல்லவில்லை. உண்மை இப்படி இருக்க, பி.வி.சிந்து இரண்டு தங்கப்பதக்கம் வென்றார் என்று பதிவிடப்பட்டுள்ளது. இந்த தகவல் தவறானது என்பதை உறுதி செய்ய ஆய்வு செய்தோம்.

உண்மைப் பதிவைக் காண: olympics.com I Archive

கூகுளில் பி.வி.சிந்து, ஒலிம்பிக், பதக்கம் என்று சில அடிப்படை வார்த்தைகளைப் பதிவிட்டுத் தேடினோம். அப்போது, 2016ம் ஆண்டு ரியோவில் நடந்த ஒலிம்பிக் போட்டியில் தான் முதன் முறையாக பி.வி.சிந்து பங்கேற்றார் என்ற தகவல் கிடைத்தது. அதுவும் ஒரு வெள்ளி, ஒரு வெண்கலம் வென்றார் என்றே விளையாட்டு தொடர்பான நம்பகமான விளையாட்டு இணைய தளங்கள் அனைத்திலும் குறிப்பிடப்பட்டிருந்தது.

உண்மைப் பதிவைக் காண: yas.gov.in I Archive

மேலும், ஒன்றிய அரசின் இளைஞர் விவகாரம் மற்றும் விளையாட்டுத் துறை அமைச்சகத்தில் 2016 ரியோ ஒலிம்பிக் பதக்கம் பெற்றவர்கள் பற்றிய விவரம் நமக்குக் கிடைத்தது. அதில், பி.வி.சிந்து வெள்ளிப் பதக்கம் வென்றார் என்று குறிப்பிடப்பட்டிருந்தது. மேலும் அந்த ஆண்டு இந்தியா தங்கப்பதக்கம் எதுவும் பெறவில்லை.

உண்மைப் பதிவைக் காண: olympics.com I Archive

2020 டோக்கியோ ஒலிம்பிக்கில் பி.வி.சிந்து வெண்கலப் பதக்கம் வென்றார் என்று செய்திகள் கிடைத்தன. மேலும் olympics.com இணைய தளத்தில் பி.வி.சிந்துவின் ஒலிம்பிக் விருது மற்றும் இதுவரை இந்தியா பெற்ற பதக்கங்கள் பட்டியல் என அனைத்திலும் பி.வி.சிந்து இதுவரை ஒரு வெள்ளி, ஒரு வெண்கல பதக்கம் வென்றார் என்றே குறிப்பிடப்பட்டிருந்தது. இதன் மூலம் பி.வி.சிந்து ஒலிம்பிக் போட்டியில் இரண்டு தங்கம் வென்றார் என்று பரவும் தகவல் தவறானது என்று உறுதி செய்யப்படுகிறது.

முடிவு:

பிவி சிந்து ஒலிம்பிக்கில் ஒரு வெள்ளி, ஒரு வெண்கலம் வென்றுள்ள நிலையில் இரண்டு தங்கப்பதக்கங்களை வென்றுள்ளார் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel I Instagram