குடிபோதையில் தடுமாறிய துரைமுருகன் என்று பரவும் வீடியோ உண்மையா?

குடி போதையில் தள்ளாடி மேடையிலிருந்து விழுந்த துரைமுருகன் என்று ஒரு வீடியோவை சிலர் சமூக ஊடகங்களில் பதிவிட்டு வருகின்றனர். இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Twitter I Archive

வாசகர் ஒருவர் நம்முடைய வாட்ஸ்அப் எண்ணுக்கு (+91 9049053770)  எக்ஸ் தள (ட்விட்டர்) பதிவை அனுப்பி, இது உண்மையா என்று கேட்டிருந்தார்.

துரைமுருகன் மேடையிலிருந்து இறங்கும் போது தடுமாறி விழுந்த வீடியோ அந்த எக்ஸ் தளத்தில் பதிவிடப்பட்டிருந்தது. நிலைத் தகவலில், “முழு மது போதையில் தள்ளாடி மேடையிலிருந்து கீழே விழுந்த குடிகார பய துரைமுருகன்!” என்று குறிப்பிடப்பட்டிருந்தது. இதையும் பலரும் பகிர்ந்து வருகின்றனர்.

உண்மை அறிவோம்:

அரசியலில் கருத்து அடிப்படையில் எதிர்ப்பு தெரிவிப்பதற்குப் பதில் தனிமனித தாக்குதல்கள் சமீபகாலமாக அதிகரித்துள்ளன. துரைமுருகன் மது அருந்திவிட்டு கீழே விழுந்தார் என்று வீடியோவை பகிர்ந்துள்ளனர். ஆனால், அவர் மது அருந்தியதற்கான ஆதாரங்களை அளிக்கவில்லை.

இந்த வீடியோ ஓராண்டுக்கு முன்பு நடந்த நிகழ்ச்சி ஒன்றில் எடுக்கப்பட்டது என்ற நினைவு இருந்ததால் இது பற்றி ஆய்வு செய்தோம். கூகுளில், தடுமாறி விழுந்த துரைமுருகன் என டைப் செய்து தேடினோம். அப்போது, தந்தி டிவி உள்ளிட்ட ஊடகங்கள் வெளியிட்டிருந்த வீடியோக்கள் நமக்குக் கிடைத்தன. அதில், தடுமாறி விழப் பார்த்த துரைமுருகனை அவரது மகனும் நாடாளுமன்ற உறுப்பினருமான கதிர் ஆனந்த் தாங்கிப் பிடித்தார் என்று குறிப்பிடப்பட்டிருந்தது.

வீடியோவில் ABP Nadu என்ற ஊடகத்தின் லோகோவை காண முடிகிறது. ஒருவேளை அந்த ஊடகம் அப்படி ஏதும் செய்தி வெளியிட்டுள்ளதா என்று அறிய அதன் யூடியூப் பக்கத்தில் துரைமுருகன் என்று டைப் செய்து தேடினோம். அப்போது, 2022 நவம்பர் 29ம் தேதி இந்த வீடியோவை அந்த ஊடகம் வெளியிட்டிருப்பது தெரிந்தது. “Duraimurugan Slipped | தடுமாறி விழப் போன அமைச்சர்.. தாங்கி பிடித்த மகன்.. பதறிய தொண்டர்கள் | DMK” என்று தலைப்பிட்டிருந்தனர். அந்த செய்தி வீடியோவில் படியில் இறங்கிய போது தடுமாறினார் என்று கூறினர். எங்கும் அவர் மது அருந்திவிட்டு வந்து தடுமாறி விழுந்தார் என்று குறிப்பிடவில்லை.

துரைமுருகன் 80 வயதைக் கடந்தவர். வயோதிகம், உயர் ரத்த அழுத்தம் உள்ளிட்ட பிரச்னை காரணமாக அவர் தடுமாறி விழுந்ததாக அப்போது வெளியான செய்திகள் தெரிவிக்கின்றன. துரைமுருகன் மது அருந்தி தடுமாறி விழுந்ததாக எந்த ஊடகமும் கூறவில்லை. மது அருந்தினார் என்று சமூக ஊடகங்களில் பதிவிட்டவரும் எந்த ஆதாரத்தையும் வழங்கவில்லை. இந்த ஆதாரங்கள் அடிப்படையில் துரைமுருகன் மது அருந்திவிட்டுத் தடுமாறி விழுந்தார் என்று பரவும் தகவல் தவறானது என்று உறுதி செய்யப்படுகிறது.

முடிவு:

படியில் இறங்கும் போது திமுக பொதுச் செயலாளர் துரைமுருகன் தடுமாறிய வீடியோவை மது அருந்திவிட்டு தடுமாறி விழுந்தார் என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel