பொது இடத்தில் பெண் ஒருவருக்கு காங்கிரஸ் முன்னாள் தலைவர் ராகுல் காந்தி முத்தமிட்டார் என்று ஒரு புகைப்படத்தைச் சிலர் சமூக ஊடகங்களில் பகிர்ந்து வருகின்றனர். அது பற்றி ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
மேடையில் பெண்மணி ஒருவருக்கு ராகுல் காந்தி முத்தமிடுவது போன்று புகைப்படம் பகிரப்பட்டுள்ளது. நிலைத் தகவலில், “நம்ம ஒன்னும் சொல்ல வேண்டாம் பின்னால உதவியாளர் முகத்தை பாருங்க போதும்” என்று குறிப்பிடப்பட்டுள்ளது.
இந்த புகைப்பட பதிவை Jeyakumar என்ற ஃபேஸ்புக் ஐடி கொண்டவர் 2023 பிப்ரவரி 7ம் தேதி பதிவிட்டுள்ளார். இவரைப் போல பலரும் இந்த படத்தை பகிர்ந்து வருகின்றனர்.
உண்மை அறிவோம்:
கடந்த ஜனவரி மாதத்தில் ராகுல் காந்தி இந்திய ஒற்றுமை நடைப் பயணம் மேற்கொண்ட போது, தன்னுடைய சகோதரி பிரியங்கா காந்திக்கு முத்தம் கொடுத்திருந்தார். அதன் பிறகு பயணம் முடிவடையும் போது காஷ்மீரில் ஐஸ் கட்டிகளை தூக்கி எறிந்து மகிழ்ச்சியாக இருந்தார். ராகுல் காந்தி தன்னுடைய தங்கை பிரியங்கா காந்திக்கு முத்தமிட்ட படத்தை எடிட் செய்து சிலர் சமூக ஊடகங்களில் பகிர்ந்து வருகின்றனர். மேலும், மிகவும் அருவருக்கத் தக்க வகையில் கமெண்ட் செய்தும் வரவே, இந்த புகைப்படம் பற்றி ஆய்வு செய்தோம்.
உண்மைப் பதிவைக் காண: zeenews.india.com I Archive 1 I ndtv.com I Archive 2
இந்த புகைப்படத்தை ரிவர்ஸ் இமேஜ் தேடலில் பதிவேற்றித் தேடினோம். அப்போது, பல செய்தி ஊடகங்களிலும் இந்த புகைப்படம் வெளியாகி இருந்தது. முழு படத்தையும் சிலர் ஃபேஸ்புக், ட்விட்டர் உள்ளிட்ட சமூக ஊடகங்களில் பதிவிட்டிருந்தனர். இந்திய ஒற்றுமை பயணத்தின் அதிகாரப்பூர்வ ட்விட்டர் பக்கத்திலும் இந்த புகைப்படங்கள் வெளியாகி இருந்தன.
நாம் ஆய்வுக்கு எடுத்துக்கொண்ட புகைப்படத்தையும், இந்திய ஒற்றுமை பயணத்தின் அதிகாரப்பூர்வ ட்விட்டர் பக்கத்தில் உள்ள படத்தையும் ஒப்பிட்டுப் பார்த்தோம். அதில் பிரியங்கா காந்தி அணிந்திருந்த உடை, பின்னணி, பாதுகாப்பு அதிகாரி என அனைத்தும் இரண்டு படங்களிலும் ஒன்றாகவே இருந்தது.
ஆனால், நாம் ஆய்வுக்கு எடுத்துக்கொண்ட படத்தில் பிரியங்கா காந்தியின் புகைப்படத்துக்கு பதில் வேறு ஒரு பெண்மணியின் புகைப்படம் இருந்தது. இந்த ஒரு வித்தியாசத்தை தவிர்த்து மற்ற எல்லாம் ஒன்றாகவே இருந்தது. நாம் ஆய்வுக்கு எடுத்துக்கொண்ட புகைப்படத்தை சற்று பெரிது செய்து பார்த்த போது, பிரியங்கா காந்தி முகத்துக்கு பதில் வேறு ஒரு பெண்மணியின் படம் ஒட்ட வைக்கப்பட்டிருப்பது தெளிவாக தெரிந்தது. போட்டோ எடிட் முறையில் இதை செய்துள்ளனர். எனவே, இந்த புகைப்படத்தை எடுத்து எடிட் செய்து விஷமத்தனமாக பகிர்ந்திருப்பது தெரிந்தது.
மேலும், ராகுல் காந்தி பிரியங்கா காந்தியுடன் மகிழ்வை பகிர்ந்துகொள்ளும் தருணத்தின் வீடியோ காட்சிகளும் கிடைத்தன. மேடையில் அமர்ந்திருக்கும் பிரியங்கா காந்தியை அணைத்து ராகுல் காந்தி முத்தமிடுகின்றார். இதன் மூலம் நாம் ஆய்வுக்கு எடுத்துக்கொண்ட புகைப்படம் எடிட் செய்யப்பட்டது என்பது தெளிவாகிறது. இதன் அடிப்படையில் இந்த பதிவு விஷமத்தனமானது. தவறானது என்று உறுதி செய்யப்படுகிறது.
முடிவு:
ராகுல் காந்தி பிரியங்கா காந்தியை முத்தமிட்ட புகைப்படத்தை எடிட் செய்து விஷமத்தனமான தகவல் சேர்த்து சமூக ஊடகங்களில் பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I Twitter I Google News Channel
Title:பிரியங்கா காந்திக்கு ராகுல் முத்தமிட்ட படத்தை எடிட் செய்து பரப்பும் விஷமிகள்!
Fact Check By: Chendur PandianResult: Altered
