துருக்கியில் நிலநடுக்கத்தால் கட்டிங்கள் இடிந்து விழும் காட்சி என்று பரவும் பழைய வீடியோக்கள்!

சீனாவில் கட்டிடங்கள் இடிக்கப்படும் வீடியோக்களை இணைத்து, துருக்கியில் நிலநடுக்கம் காரணமாக இடிந்து விழும் குடியிருப்புக்கள் என்று சிலர் சமூக ஊடகங்களில் பகிர்ந்து வருகின்றனர்.

உண்மை அறிவோம்:

உண்மைப் பதிவைக் காண: Facebook I Archive

அடுக்குமாடி கட்டிடங்கள் இடிக்கப்படும் வீடியோக்களை ஒன்று சேர்த்து பகிர்ந்துள்ளனர். நிலைத் தகவலில், “துருக்கி நிலநடுக்கம்” என்று குறிப்பிடப்பட்டுள்ளது. இந்த வீடியோ பதிவை மனோ கேதீஸ் என்ற ஃபேஸ்புக் ஐடி கொண்டவர் 2023 பிப்ரவரி 7ம் தேதி பதிவிட்டுள்ளார். இதை பலரும் ஷேர் செய்து வருகின்றனர்.

உண்மை அறிவோம்:

சமீபத்தில் துருக்கி, சிரியாவில் சக்திவாய்ந்த நிலநடுக்கம் ஏற்பட்டது. பல கட்டிடங்கள் இடிந்து விழுந்து ஆயிரக்கணக்கானோர் அதனுடன் புதைந்து போயினர். அவர்களை மீட்கும் பணி நடந்து வருகிறது. இந்த சூழலில் துருக்கியில் நிலநடுக்கத்தால் ஏற்பட்ட பாதிப்பு என்று பழைய புகைப்படங்கள், வீடியோக்களை எல்லாம் பலரும் சமூக ஊடகங்களில் பகிர்ந்து வருகின்றனர்.

நாம் ஆய்வுக்கு எடுத்துக்கொண்ட வீடியோ பதிவில் இரண்டு வீடியோக்கள் இணைக்கப்பட்டுள்ளன. வெடி பொருட்கள் வெடிக்கும் சத்தம் கேட்கிறது. அதன் பிறகு கட்டிடங்கள் இடிந்து விழுகின்றன. எனவே, எங்கோ கட்டிடம் இடிக்கப்படும் வீடியோவை துருக்கியில் நிலநடுக்கத்தால் சரிந்து விழும் கட்டிடம் என்று தவறாக பகிர்ந்திருக்கலாம் என்ற சந்தேகத்தின் அடிப்படையில் ஆய்வு செய்தோம்.

வீடியோ காட்சிகளைப் புகைப்படங்களாக மாற்றி கூகுள் ரிவர்ஸ் இமேஜ் தேடல் செய்தோம். அப்போது, இரண்டு வீடியோக்களும் சீனாவில் எடுக்கப்பட்டது என்று பல ஆண்டுகளாக செய்தி, சமூக ஊடகங்களில் இந்த வீடியோ பகிரப்பட்டு வந்திருப்பதைக் காண முடிந்தது. முன்பக்கம் சற்று உருளையாக இருக்கும் கட்டிடம் இடிந்து விழும் வீடியோ சீனாவில் எங்கு எடுக்கப்பட்டது என்று தகவல் நமக்குக் கிடைக்கவில்லை. ஆனால், இதன் முழு வீடியோ நமக்குக் கிடைத்தது. 

வீடியோவில் உள்ளவர்கள் அணிந்திருக்கும் சட்டையில் சீன எழுத்துக்களைக் காண முடிகிறது. மேலும் இந்த வீடியோக்கள் 2021ம் ஆண்டு முதல் சமூக ஊடகங்களில் பகிரப்பட்டு வந்திருப்பதும் தெரிந்தது. துருக்கி நிலநடுக்கம் 2023 பிப்ரவரியில் ஏற்பட்டது. அதற்கு இரண்டு ஆண்டுகளுக்கு முன்பே இந்த வீடியோ சமூக ஊடகங்களில் பகிரப்பட்டிருப்பதன் மூலம் இது துருக்கி நிலநடுக்க காட்சி இல்லை என்பது தெளிவானது.

உண்மைப் பதிவைக் காண: indianexpress.com I Archive 1 I re-thinkingthefuture.com I Archive 2

இரண்டாவதாகப் பல அடுக்கு மாடிகள் ஒரே நேரத்தில் இடிக்கப்படும் வீடியோ பற்றித் தேடினோம். இந்த வீடியோ சீனாவின் Yunnan மாகாணத்தில் எடுக்கப்பட்டது என்று தெரிந்தது. 15 உயர் அடுக்கு மாடிக் கட்டிடங்கள் ஒரே நேரத்தில் இடிக்கப்பட்டதாகச் செய்திகள் கூறுகின்றன. கட்டி முடிக்கப்பட்டு எட்டு ஆண்டுகள் ஆகியும் யாரும் பயன்படுத்த வராததால் அவை இடிக்கப்பட்டது என்று குறிப்பிடப்பட்டிருந்தது. 

These 15 residential blocks were demolished last month in Kunming, Yunnan, China. Built in 2011-13, they had lain empty and unfinished for eight years. 🎥 source: IG allthingschina h/t @marcvidal pic.twitter.com/Shgq7p4S0S

— Ian Fraser (@Ian_Fraser) September 15, 2021

Archive

இந்த வீடியோவும் 2021ம் ஆண்டில் இருந்து சமூக ஊடகங்களில் பகிரப்பட்டு வந்திருப்பது தெரிந்தது. இதன் மூலம் இதுவும் துருக்கி நிலநடுக்கத்தின் போது எடுக்கப்பட்டது இல்லை என்பது தெளிவாகிறது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

சீனாவில் பயன்பாட்டில் இல்லாத பழைய அடுக்குமாடி கட்டிடங்களை இடிக்கும் வீடியோவை துருக்கி நிலநடுக்கத்துடன் தொடர்புபடுத்தி சமூக ஊடகங்களில் தவறாக பகிர்ந்து வருவதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel