சீன உளவு பலூனை அமெரிக்க விமானப்படை சுட்டு வீழ்த்திய காட்சி என்று ஒரு வீடியோ சமூக ஊடகங்களில் பகிரப்பட்டு வருகிறது. அது பற்றி ஆய்வு செய்தோம்.
தகவலின் விவரம்:
உண்மைப் பதிவைக் காண: Facebook I Archive
சீன நாட்டின் உளவு பலூனை அமெரிக்க விமானப்படை விமானங்கள் சுட்டு வீழ்த்துவது போன்று வீடியோ பகிரப்பட்டுள்ளது. நிலைத் தகவலில், “சீன உளவு பலூனை அமெரிக்க விமானப்படை சுட்டு வீழ்த்திய வீடியோ” என்று குறிப்பிடப்பட்டுள்ளது. இந்த வீடியோவை YJ Pondicherry என்ற ஃபேஸ்புக் ஐடி கொண்டவர் 2023 பிப்ரவரி 9ம் தேதி பதிவிட்டுள்ளார். இவரைப் போல பலரும் இந்த வீடியோவை பகிர்ந்து வருகின்றனர்.
உண்மை அறிவோம்:
அமெரிக்காவின் மான்டானா மாகாணத்தில் உள்ள பில்லிங்க்ஸ் என்ற நகரில் வானில் வெள்ளை நிற பலூன் ஒன்று பரப்பதை மக்கள் பார்த்தனர். ஆய்வில் அது சீன உளவு பலூன் என்று கண்டறியப்பட்டதாக செய்திகள் வெளியாகின. அதே போன்று மேலும் மூன்று உளவு பொருட்கள் கண்டறியப்பட்டதாக கூறப்பட்டது. அந்த பலூனை அமெரிக்க அரசு சுட்டு வீழ்த்தியது.
இந்த நிலையில் அமெரிக்க விமானப்படை சீன உளவு பலூனை சுட்டு வீழ்த்திய காட்சி என்று ஒரு வீடியோ சமூக ஊடகங்களில் பகிரப்பட்டு வருகிறது. Reuters செய்தி நிறுவனம் வெளியிட்டிருந்த படத்தில் பலூன் தீப்பிழம்பு போன்று எதுவும் இல்லை. ஆனால், நாம் ஆய்வுக்கு எடுத்துக்கொண்ட வீடியோவில் பலூன் தீப்பிழப்பாக வெடித்துச் சிதறுவது போல காட்டப்பட்டிருந்தது. எனவே, இந்த வீடியோ பற்றி ஆய்வு செய்தோம்.
வீடியோவை புகைப்படமாக மாற்றி கூகுள் ரிவர்ஸ் இமேஜ் தேடல் உள்ளிட்ட பல்வேறு புகைப்பட மூலங்களைத் தேடும் இணையதளங்களில் பதிவேற்றித் தேடினோம். அப்போது, பலரும் இந்த வீடியோவை அமெரிக்க விமானப்படை பலூனை சுட்டு வீழ்த்திய வீடியோ என்று பகிர்ந்திருப்பதைக் காண முடிந்தது. அவற்றுக்கு இடையே யூடியூப் வீடியோ ஒன்று கிடைத்தது. அது கம்ப்யூட்டர் கிராபிக்ஸ் முறையிலான டிஜிட்டல் காம்பேட் ஸ்டிமுலேட்டர் (Digital Combat Simulator) வீடியோ என்று குறிப்பிடப்பட்டிருந்தது.
டிஜிட்டல் காம்பேட் ஸ்டிமுலேட்டர் என்றால் என்ன என்று அறிந்துகொள்ள அது பற்றித் தேடினோம். போர் தொடர்பான வீடியோ விளையாட்டு என்று தெரிந்தது. தத்ரூபமான போர் காட்சிகளைக் கொண்ட விளையாட்டு அது. நமக்கு கிடைத்த யூடியூப் வீடியோவில் உள்ள குறிப்பு பகுதியில், பார்ப்பவர்கள் வியப்படையும் வகையில் வீடியோவை மேம்படுத்த சிறப்பு ஒலியைப் பயன்படுத்தியுள்ளேன். மேலும் வண்ணங்களை மாற்றியுள்ளேன். விருப்பமானவர்கள் இதைப் பதிவிறக்கம் செய்து வேறு வண்ணங்கள், டிசைன்களை செய்துகொள்ளலாம்” என்ற வகையில் குறிப்பிடப்பட்டிருந்தது.
Growling Sidewinder என்ற யூடியூப் சேனல் இந்த வீடியோவை பிப்ரவரி 5, 2023 அன்று வெளியிட்டிருந்தது. இதே போன்று ஏராளமான வீடியோக்களை அந்த சேனல் வெளியிட்டுள்ளது. இதன் மூலம் இந்த வீடியோ சீன பலூனை வீழ்த்திய உண்மையான வீடியோ இல்லை என்று தெரிந்தது.
சீன பலூன் வீழ்த்தப்பட்டது தொடர்பாக அமெரிக்க விமானப்படை வழங்கிய புகைப்படங்களை Reuters வெளியிட்டிருந்தது. மேலும், விமானப்படை விமானங்கள் சீன உளவு பலூனை வீழ்த்திய காட்சியைப் பலரும் நேரடியாக பதிவு செய்துள்ளனர். அமெரிக்காவின் தொலைக்காட்சி ஊடகங்களும் பலூன் வீழ்த்தப்பட்டதை வீடியோ எடுத்துள்ளன. அந்த வீடியோக்களில் பலூன் எரிந்து விழுவது போல இல்லை. இவை எல்லாம் நாம் ஆய்வுக்கு எடுத்துக்கொண்ட வீடியோ உண்மையானது இல்லை என்பதை உறுதி செய்தன.
நம்முடைய ஆய்வில், அமெரிக்க விமானப்படை சீன உளவு பலூனை சுட்டு வீழ்த்திய காட்சி என்று பரவும் வீடியோ உண்மையானது இல்லை என்று உறுதி செய்யப்பட்டுள்ளது. டி3 அனிமேஷன் Digital Combat Simulator வீடியோ என்பது உறுதி செய்யப்பட்டுள்ளது. இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.
முடிவு:
கம்ப்யூட்டர் கிராஃபிக்ஸ் வீடியோவை அமெரிக்க விமானப்படை சீன உளவு பலூனை வீழ்த்திய காட்சி என்று தவறாக பகிர்ந்திருப்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.
சமூக ஊடகங்களில் எங்களை பின் தொடர விரும்பினால்…
Facebook I Twitter I Google News Channel
Title:சீன உளவு பலூனை அமெரிக்கா சுட்டு வீழ்த்திய காட்சி என்று பரவும் வீடியோ உண்மையா?
Fact Check By: Chendur PandianResult: False
