கேரளா ஸ்டோரி படத்துக்கு ஆதரவு தெரிவித்த இஸ்லாமியப் பெண் என்று பரவும் வீடியோ உண்மையா?

கேரளா ஸ்டோரி படத்துக்கு இஸ்லாமிய பெண் ஒருவர் ஆதரவு தெரிவித்ததாக ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

இஸ்லாமிய பெண் ஒருவரை ஊடகங்கள் பேட்டி எடுக்கும் வீடியோ பகிரப்பட்டுள்ளது. அவர், “படம் அப்போ முஸ்லிம்களுக்கு நாட் அலவுட்னு போட்டுடுங்க. வித் ஹிஜாப் நாட் அலவுடுன்னு போட்டுடுங்க. சம்பந்தம் இல்லாம பேசுறீங்களே” என்கிறார். பேட்டி எடுப்பவர் “இது கிளாமர் படம் மேடம்” என்று சொல்ல, பதிலுக்கு அவர், “அவங்க பிட்டு துணி போட்டுட்டா படம் போட்டிருக்காங்க. அப்படி இல்லையே” என்கிறார். படம் பார்த்துட்டுத்தானே வறீங்க என்று பதிலுக்கு கேட்க, அவரோ, “அவங்க அம்மணமா இல்லையே. அதுக்கும் இந்த டிரஸ்சுக்கும் என்ன சம்பந்தம்? எனக்கு புரியலை” என்கிறார். பேட்டி எடுப்பவர், “படத்துக்கு ஏ சர்டிபிகேட் கொடுத்திருக்காங்க” என்று கூற, அந்த இஸ்லாமிய பெண்ணோ, “அதுக்காக… படம் பார்க்கக் கூடாதுன்னு ஏதாச்சும் ரூல்ஸ் இருக்கா?” என்கிறார். இப்படி இருவருக்கும் இடையே உரையாடல் செல்கிறது.

நிலைத் தகவலில், “சூப்பர் சகோதரி… அவுங்க ஒன்னும் அம்மணமாக நடிக்கலையே நான் ஏன் படம் பாக்ககூடாது? #TheKeralaStory” என்று குறிப்பிடப்பட்டிருந்தது. இந்த வீடியோ பதிவை Karthi Anjana என்ற ஃபேஸ்புக் ஐடி கொண்டவர் 2023 மே 9ம் தேதி பதிவிட்டுள்ளார். இந்த வீடியோ பதிவை பலரும் சமூக ஊடகங்களில் பதிவிட்டு வருகின்றனர்.

உண்மை அறிவோம்:

கேரளாவில் இருந்து நூற்றுக் கணக்கான பெண்கள் மத மாற்றம் செய்யப்பட்டு வெளிநாடுகளுக்கு அனுப்பப்பட்டு பயங்கரவாத செயல்களில் ஈடுபடுத்தப்படுவதாக கூறி சமீபத்தில் திரைப்படம் ஒன்று வெளியாகி இருந்தது. இதற்கு இஸ்லாமியர் உள்ளிட்ட பல தரப்பிலிருந்தும் எதிர்ப்பு கிளம்பியது. அதே நேரத்தில் பாஜக மற்றும் சங் பரிவார் அமைப்புகள் மத்தியில் இந்த படத்துக்கு ஆதரவு அதிகரித்தது. படத்துக்கு வரி விலக்கு உள்ளிட்ட சலுகைகளை பா.ஜ.க ஆளும் மாநிலங்கள் அளித்தன.

இந்த நிலையில் இந்த படத்துக்கு இஸ்லாமியப் பெண் ஒருவர் ஆதரவு அளித்தது போன்று வீடியோ பகிரப்பட்டுள்ளது. ஆனால், இந்த வீடியோ சில மாதங்களுக்கு முன்பு சமூக ஊடகங்களில் வைரலாக பகிரப்பட்டது. எனவே, இந்த இஸ்லாமியப் பெண் கேரளா ஸ்டோரி படத்துக்கு ஆதரவு தெரிவித்தார் என்பது தவறான தகவல் என்பது நமக்குத் தெரிந்தது. 

எனவே, இந்த பெண்மணியின் பழைய வீடியோவை தேடினோம். வீடியோவில் ஒரு மைக்கில் வாய்ஸ் ஆப் மெட்ராஸ் என்று இருந்தது. எனவே, அந்த யூடியூபில் அந்த பெயரில் ஏதேனும் சேனல் உள்ளதா என்று தேடிப் பார்த்தோம். நீண்ட தேடலுக்குப் பிறகு நமக்கு அந்த வீடியோ கிடைத்தது. “ஹிஜாப் போட்ட படம் பார்க்கக் கூடாதா. சண்டையில் முடிந்த ரிவ்யூ” என்று நாம் ஆய்வுக்கு எடுத்துக்கொண்ட வீடியோவில் உள்ள பெண்ணின் புகைப்படத்துடன் முகப்பு புகைப்படம் (Thumbnail) வைத்து வீடியோ வெளியிடப்பட்டிருந்தது. 

தொடக்கத்திலேயே அந்த இஸ்லாமிய பெண் பேசியதை வைத்து ப்ரமோ செய்திருந்தார்கள். அந்த வீடியோவின் 2.10வது நிமிடத்தில் நாம் ஆய்வுக்கு எடுத்துக்கொண்ட வீடியோ காட்சிகள் இருந்தன. அந்த வீடியோ கடந்த 2022 டிசம்பர் 30ம் தேதி பதிவேற்றம் செய்யப்பட்டிருந்தது.

ஓ மை கோஸ்ட் என்ற திரைப்படத்திற்கு வருகை தந்த அந்த இஸ்லாமியப் பெண்ணிடம், படம் எப்படி இருக்கிறது என்று யூடியூப் சேனலை சார்ந்தவர்கள் கேட்டுள்ளனர். அப்போதுதான் இந்த வாக்குவாதம் நடந்துள்ளது. பேட்டி எடுத்தவர் படத்துக்கு ஏ சான்றிதழ் வழங்கப்பட்டுள்ளது என்று கூறியிருந்தார். பொதுவாக ஏ சான்றிதழ் பெற்ற திரைப்படம் என்றால் குழந்தைகள் பார்க்க அனுமதி இல்லை. ஆனால், பெண்கள் பார்க்கக் கூடாது என்பது போலவும் அதுவும் இஸ்லாமியப் பெண் பார்க்கவே கூடாது என்பது போலவும் கேள்வி எழுப்பியுள்ளனர். ஆனால், அப்படி எந்த சட்ட விதியும் இல்லை என்பதே உண்மை. 

இந்த படத்துக்கு ஏ சான்றிதழ் வழங்கப்பட்டுள்ளதா என்று பார்த்தோம். ஆனால், ஓ மை கோஸ்ட் படத்துக்கு யுஏ சான்றிதழ் வழங்கப்பட்டுள்ளதாக டைம்ஸ் ஆஃப் இந்தியா உள்ளிட்ட ஊடகங்களில் வெளியான செய்திகள் கிடைத்தன. எனவே, அந்த பெண் ஏ சான்றிதழ் பெற்ற படத்துக்கு வந்தார் என்ற தகவலும் தவறானது.

நம்முடைய ஆய்வில் 2022 டிசம்பரில் வெளியான ஓ மை கோஸ்ட் படத்துக்கு வந்த இஸ்லாமியப் பெண்ணிடம் யூடியூப் சேனல்கள் கேள்வி எழுப்பிய வீடியோவை, கேரளா ஸ்டோரியோடு தொடர்புப்படுத்தி தவறாகப் பகிர்ந்திருப்பது தகுந்த ஆதாரங்கள் அடிப்படையில் உறுதி செய்யப்பட்டுள்ளது. இதன் அடிப்படையில் நாம் ஆய்வுக்கு எடுத்துக்கொண்ட வீடியோ தவறானது என்று உறுதி செய்யப்படுகிறது.

முடிவு:

கேரளா ஸ்டோரி திரைப்படத்துக்கு இஸ்லாமிய பெண் ஆதரவு தெரிவித்ததாக பரவும் வீடியோ தவறானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel