பெண்களுடன் நடனமாடிய நரேந்திர மோடி என்று பரவும் வீடியோ உண்மையா?

பிரதமர் மோடி பெண்களுடன் நடனமாடுவது போன்று ஒரு வீடியோ சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பிரதமர் நரேந்திர மோடி பெண்களுடன் சேர்ந்து நடனமாடுவது போன்று வீடியோ ஃபேஸ்புக்கில் 2023 நவம்பர் 9ம் தேதி பகிரப்பட்டுள்ளது. நிலைத் தகவலில், "பிரதமர் வேலையை தவிர எல்லா வேலையும் செய்யுறிங்க" என்று குறிப்பிடப்பட்டிருந்தது. இதை பலரும் ஷேர் செய்து வருகின்றனர்.

உண்மை அறிவோம்:

இந்த வீடியோ தெளிவாக இல்லை, மேலும் அந்த நபர் சில நேரங்களில் பார்க்கும் போது மோடி போல இல்லை. எனவே, இந்த வீடியோ தொடர்பாக ஆய்வு செய்தோம்.

முதலில் நரேந்திர மோடி இப்படி நடனமாடினாரா என்று தேடிப் பார்த்தோம். பிரதமர் நரேந்திர மோடி நாம் ஆய்வுக்கு எடுத்துக்கொண்ட வீடியோவில் உள்ளது போன்று பெண்களுடன் நடனமாடியதாக எந்த ஒரு வீடியோவும் செய்தியும் நமக்கு கிடைக்கவில்லை.

வீடியோ காட்சிகளை புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது, வீடியோவில் இருக்கும் நபர் மோடி போன்று தோற்றம் கொண்ட விகாஸ் மகந்தே (Vikas Mahante) என்று குறிப்பிட்டு சில எக்ஸ் (ட்வீட்டர்) பதிவுகள் நமக்கு கிடைத்தன. இதன் அடிப்படையில் Vikas Mahante என்று யாராவது உள்ளார்களா என்று கூகுளில் தேடினோம். அப்போது அந்த நபரின் இன்ஸ்டாகிராம், ஃபேஸ்புக் பக்கங்கள் நமக்கு கிடைத்தன.

உண்மைப் பதிவைக் காண: instagram.com

இன்ஸ்டாகிராம் பக்கத்தில் லண்டனில் நடந்த தீபாவளி திருவிழாவில் சிறப்பு விருந்தினராகப் பங்கேற்றேன் என்று குறிப்பிட்டு வீடியோ ஒன்றை அந்த நபர் வெளியிட்டிருந்தார். அதில் அவர் மேடைக்கு வருவதையும், மேடையிலிருந்த பெண்களுடன் அவர் பேசியதையும் பகிர்ந்திருந்தார். அதில் நாம் ஆய்வுக்கு எடுத்துக்கொண்ட வீடியோவில் நடனமாடிய பெண்களைக் காண முடிந்தது. மேலும் மேடை அலங்காரமும் இரண்டு வீடியோவிலும் ஒன்றாக இருந்தது.

உண்மைப் பதிவைக் காண: Facebook

இதன் அடிப்படையில் சமூக ஊடகங்களில் லண்டன் தீபாவளி திருவிழா 2023 என்பது உள்ளிட்ட சில அடிப்படை வார்த்தைகளைப் பயன்படுத்தித் தேடினோம். அப்போது, லண்டன் தீபாவளி விழாவில் மோடி போன்ற தோற்றம் கொண்ட நபர் பங்கேற்க உள்ளார் என்ற அறிவிப்புடன் சில பதிவுகள் நமக்குக் கிடைத்தன.

மேலும், லண்டனைச் சேர்ந்த சிலர் வெளியிட்டிருந்த வீடியோ பதிவுகளும் நமக்குக் கிடைத்தன. அதில் நாம் ஆய்வுக்கு எடுத்துக்கொண்ட பதிவில் உள்ளது போன்ற வீடியோ பகிரப்பட்டிருந்தது. அந்த வீடியோ மிகத் தெளிவாக இருந்தது. அதில் உள்ள நபர் பிரதமர் நரேந்திர மோடி இல்லை. அவரைப் போல தோற்றம் கொண்ட வேறு ஒரு நபர் என்பது தெளிவானது.

வீடியோவில் இருப்பவர் மோடி இல்லை என்பதை மேலும் உறுதிசெய்ய, Vikas Mahante-வை அவரது இன்ஸ்டாகிராம் பக்கம் மூலம் தொடர்புகொண்டு கேட்டோம். நமக்கு பதில் அளித்த அவர், “இந்த வீடியோ சமீபத்தில் நான் பங்கேற்ற லண்டனில் நடந்த தீபாவளி விழாவின் போது எடுக்கப்பட்டது. வீடியோவில் இருக்கும் நபர் மோடி இல்லை. அது நான்தான். மோடி போன்று தோற்றம் உள்ளதால் இது போன்ற நிகழ்ச்சிகளுக்கு சிறப்பு விருந்தினராக அழைக்கப்படுவேன். இது தவிர மோடி போன்று திரைப்படத்திலும் நடித்துள்ளேன். நிகழ்ச்சிகளில் நான் பங்கேற்பது தொடர்பான விவரத்தை அறிய என்னுடைய மேலாளரைத் தொடர்புகொள்ளலாம்” என்றார். இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறான புரிதலை ஏற்படுத்தும் வகையில் இருப்பது உறுதி செய்யப்படுகிறது.

முடிவு:

பெண்களுடன் நடனமாடிய பிரதமர் நரேந்திர மோடி என்று பரவும் வீடியோ தவறானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.