ரூ.5000 கோடி கடத்திய அண்ணாமலை என ஜூ.வி அட்டைப்படம் வெளியிட்டதா?

அண்ணாமலை கடத்திச் சென்ற ரூ.5000 கோடி யாருடைய பணம் என்று ஜூனியர் விகடனில் வெளியிட்டது போன்று அட்டைப்படம் ஒன்று சமூக ஊடகங்களில் வைரலாக பகிரப்பட்டு வருகிறது. அது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

நம்முடைய வாசகர் ஒருவர் ஃபேக்ட் கிரஸண்டோ வாட்ஸ் அப் சாட்பாட் எண்ணுக்கு ஃபேஸ்புக் லிங்க் ஒன்றை அனுப்பி அது உண்மையா என்று கேட்டிருந்தார். அந்த லிங்கை திறந்து பார்த்தோம். அதில் ஜூனியர் விகடன் வெளியிட்டது போன்று அட்டைப்படம் பகிரப்பட்டிருந்தது. அதில், “அண்ணாமலை கடத்திச் சென்ற ரூ.5000 கோடி யாருடைய பணம்?” என்று குறிப்பிடப்பட்டிருந்தது.

நிலைத்தகவலில், “ஆள பாத்தா பேக்கு மாதிரி இருந்துட்டு , 5000 கோடி ஆட்டையபோட்டுட்டு போயிருக்கானே ….” என்று குறிப்பிடப்பட்டிருந்தது. இந்த புகைப்பட பதிவை ஒற்றைச் செங்கல் – Single Brick என்ற ஃபேஸ்புக் பக்கம் 2022 அக்டோபர் 5ம் தேதி வெளியிட்டிருந்தது. பலரும் இதை பகிர்ந்து வருகின்றனர்.

உண்மை அறிவோம்:

தமிழ்நாடு பாஜக தலைவராக இருக்கும் அண்ணாமலை சமீபத்தில் அமெரிக்காவுக்கு சென்றிருந்தார். அவர் ரூ.5000 கோடி பணத்தை கடத்திச் சென்றால் என்று ஜூனியர் விகடன் அட்டைப்படம் வெளியிட்டதாக பலரும் சமூக ஊடகங்களில் பகிர்ந்து வருகின்றனர். இது உண்மையா என்று ஆய்வு செய்தோம்.

ஜூனியர் விகடனின் சமீபத்திய அட்டைப் படங்களை பார்வையிட்டோம். நாம் ஆய்வுக்கு எடுத்துக்கொண்டது போன்று அட்டைப்படம் ஜூனியர் விகடன் வெளியிடவில்லை என்பது தெரிந்தது. நாம் ஆய்வுக்கு எடுத்துக்கொண்ட படத்தில் வால்யும் 40, இஷ்யூ 72 என்று குறிப்பிடப்பட்டிருந்தது. தேதி சரியாகத் தெரியவில்லை, அக்டோபர் 9, 2022 என்பது போலத் தேதி அலசலாக தெரிந்தது. அக்டோபர் 9ம் தேதி வெளியான அட்டைப்படத்தில் ஓபிஎஸ், இபிஎஸ் இடம் பெற்றிருந்தனர். 

உண்மைப் பதிவைக் காண: vikatan.com

நாம் ஆய்வுக்கு எடுத்துக்கொண்ட ஜூனியர் விகடன் அட்டையில் குறிப்பிடப்பட்டிருந்த இஷ்யூ 72 இதழைத் தேடி எடுத்தோம். அது 2022 செப்டம்பர் 7ம் தேதியிட்ட இதழ் என்பது தெரிந்தது. அதில் வெறும் பேச்சு அண்ணாமலை புஸ்ஸ் என்று அண்ணாமலையை விமர்சித்து அட்டைப்படம் வெளியாகி இருப்பது தெரிந்தது.

நாளைய ஜூனியர் விகடனில்!#Annamalai #Bjp pic.twitter.com/xbTIJXg1ow

— @JuniorVikatan (@JuniorVikatan) September 2, 2022

நாம் ஆய்வுக்கு எடுத்துக்கொண்ட அட்டைப்படத்தை ஜூனியர் விகடனின் சமூக ஊடகம் – டிஜிட்டல் பிரிவு பொறுப்பாளருக்கு அனுப்பி விசாரித்தோம். அவரும் அது போலியானது என்றார். அண்ணாமலை பணத்தை கடத்திச் சென்றார் என்று எந்த கட்டுரையையும் வெளியிடவில்லை என்று நம்மிடம் தெரிவித்தனர். இந்த ஆதாரங்கள் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

அண்ணாமலை ரூ.5000 கோடியை அமெரிக்காவுக்கு கடத்தினார் என்று பரவும் ஜூனியர் விகடன் அட்டைப்படம் உண்மையானது இல்லை என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel