மோடியை சீண்ட பட்டப் படிப்புச் சான்றிதழை வெளியிட்டாரா ஷாருக் கான்?

பிரதமர் மோடியின் கல்வித் தகுதி தொடர்பான சர்ச்சை பெரிதாகியுள்ள நிலையில் நடிகர் ஷாருக் கான் தன்னுடைய படிப்பு சான்றிதழை வெளியிட்டுள்ளார் என்பது போன்று ஒரு பதிவு சமூக ஊடகங்களில் பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

நடிகர் ஷாருக்கான் தன்னுடைய பட்டப்படிப்பு சான்றிதழை காட்டும் புகைப்படம் பகிரப்பட்டுள்ளது. அதில், “இந்தி சூப்பர் ஸ்டார் ஷாருக்கான் (SRK) தனது டிகிரி சர்டிஃபிகேட்டுடன் இருக்கும் போட்டோ வெளியாகி இருக்கிறது. இப்படி ஒவ்வொருத்தரா டிகிரி சர்டிஃபிகேட்டுடன் பண்ண வரிசை கட்டி கிட்டு வந்தா நான் என்னடா செய்வேன்? என நரேந்திரன்ஜி புலம்புவதாக தகவல்!” என்று குறிப்பிடப்பட்டிருந்தது.

நிலைத் தகவலில், “சாருக்கான் அவர் பங்குக்கு ஜீ யை வெச்சு செஞ்சுட்டார்” என்று குறிப்பிடப்பட்டிருந்தது. இந்த பதிவை Xavier Chinnappan என்ற ஃபேஸ்புக் ஐடி கொண்டவர் 2023 ஏப்ரல் 4ம் தேதி வெளியிட்டுள்ளார். இதை பலரும் பகிர்ந்து வருகின்றனர்.

உண்மை அறிவோம்:

பிரதமர் நரேந்திர மோடியின் பட்டம் மற்றும் பட்ட மேற்படிப்பு சான்றிதழ் தொடர்பாக ஆம் ஆத்மி கட்சி பிரச்னை எழுப்பி வருகிறது. இந்த நிலையில் நடிகர் ஷாருக் கான் தன்னுடைய பட்டப்படிப்பு சான்றிதழை வெளியிட்டுள்ளது போன்று சமூக ஊடகங்களில் பலரும் பகிர்ந்து வருகின்றனர். மேலும், மோடியை சீண்டும் வகையில் ஷாருக் கான் தன்னுடைய பட்டப்படிப்பு சான்றிதழை வெளியிட்டுள்ளார் என்பது போலவும் கருத்தைப் பலரும் பகிர்ந்து வருகின்றனர். எனவே, இது தொடர்பாக ஆய்வு செய்தோம்.

உண்மைப் பதிவைக் காண: indianexpress.com I Archive

படத்தை கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது, 2016ம் ஆண்டு பிப்ரவரி மாதம் இந்த படத்துடன் கூடிய செய்தியை பல ஊடகங்களும் வெளியிட்டிருப்பது தெரிந்தது. இந்தியன் எக்ஸ்பிரஸ் வெளியிட்டிருந்த செய்தியை பார்த்தோம். அதில், நடிகர் ஷாருக் கான் டெல்லி ஹான்ஸ்ராஜ் கல்லூரியில் படித்தார் என்றும், அவர் படித்து முடித்து 28 ஆண்டுகள் ஆன நிலையில் தன்னுடைய பட்டப்படிப்பு சான்றிதழை அவர் வாங்கினார் என்றும் குறிப்பிட்டிருந்தனர்.

நடிகர் ஷாருக் கான் பட்டப்படிப்பை முடித்து 28 ஆண்டுகள் ஆன நிலையில் கடந்த 2016ம் ஆண்டு பட்டப்படிப்பு சான்றிதழை பெற்றுள்ளார். அப்போது எடுக்கப்பட்ட படத்தை 2023ல் வெளியிட்டு, இப்போது எடுக்கப்பட்டது போலவும், பிரதமர் மோடியின் பட்டப்படிப்பு சர்ச்சை எதிரொலியாக ஷாருக் கான் தன் பட்டப்படிப்பு சான்றிதழை வெளியிட்டுள்ளார் என்றும் தவறாகப் பகிர்ந்துள்ளனர். இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறான புரிதலை ஏற்படுத்தும் வகையில் உள்ளது… தவறானது என்று உறுதி செய்யப்படுகிறது.

முடிவு:

பிரதமர் மோடியின் பட்டப்படிப்பு சான்றிதழ் நம்பகத்தன்மை தொடர்பான சர்ச்சை எழுந்துள்ள நிலையில் நடிகர் ஷாருக் கான் தன் பட்டப்படிப்பு சான்றிதழை வெளியிட்டுள்ளார் என்று பரவும் தகவல் தவறானது என்பதை ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel