‘சைக்கிள் ரிக்‌ஷா ஓட்டிய எ.வ.வேலு’ என்று பரவும் புகைப்படம் உண்மையா?

திமுக தலைவராக இருந்த மு.கருணாநிதிக்கு சைக்கிள் ரிக்‌ஷா ஓட்டிய எ.வ.வேலு என்று ஒரு புகைப்படம் சமூக ஊடகங்களில் பகிரப்பட்டு வருகிறது. இது தொடர்பாக ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

தமிழ்நாடு அமைச்சர் எ.வ.வேலுவின் புகைப்படம் மற்றும் திமுக தலைவராக இருந்த மு.கருணாநிதியின் தேர்தல் பிரசார ரிக்‌ஷாவை ஒருவர் ஒட்டி வரும் புகைப்படத்தையும் சேர்த்து ஃபேஸ்புக்கில் பதிவிடப்பட்டுள்ளது. நிலைத் தகவலில், “எ.வ. வேலுவின் பரிணாம வளர்ச்சி” என்று குறிப்பிடப்பட்டிருந்தது. நாம் ஆய்வுக்கு எடுத்துக்கொண்ட பதிவானது ஃபேஸ்புக்கில் நவம்பர் 5, 2023 அன்று பதிவிடப்பட்டிருந்தது.

உண்மை அறிவோம்:

சமீபத்தில் வருமான வரித் துறை சோதனைக்கு ஆளானவர் தி.மு.க அமைச்சர் எ.வ.வேலு. இவர் ஆரம்ப காலத்தில் கருணாநிதிக்கு சைக்கிள் ரிக்‌ஷா ஓட்டினார் என்பது போலவும் அவருக்கு எப்படி கோடிக் கணக்கில் சொத்து வந்தது என்றும் சந்தேகம் எழுப்பும் வகையில் சமூக ஊடகங்களில் பலரும் பதிவிட்டு வருகின்றனர். படத்தில் இருப்பவருக்கும் எ.வ.வேலுக்கும் எந்த உருவ ஒற்றுமையும் இல்லை. எனவே, எ.வ.வேலு சைக்கிள் ஓட்டியதாகப் பரவும் புகைப்படம் உண்மையா என்று ஆய்வு செய்தோம்.

கருணாநிதி சைக்கிள் ரிக்‌ஷாவில் பிரசாரம் செய்யும் படத்தை கூகுள் ரிவர்ஸ் இமேஜ் தேடலில் பதிவேற்றித் தேடினோம். இந்த புகைப்படத்தை தி இந்து ஆங்கில நாளிதழ் வெளியிட்டிருப்பது தெரிந்தது. அதில் இந்த புகைப்படம் 1991ம் ஆண்டு மே 11ம் தேதி எடுக்கப்பட்டதாகக் குறிப்பிடப்பட்டிருந்தது. அதில், “தமிழ்நாடு சட்டமன்ற தேர்தலையொட்டி துறைமுகம் தொகுதியில் பிரசாரம் மேற்கொண்ட போது எடுக்கப்பட்ட புகைப்படம்” என்று குறிப்பிடப்பட்டிருந்தது.

உண்மைப் பதிவைக் காண: thehindu.com I Archive

எ.வ.வேலு எனப்படும் எ.வஜ்ஜிரவேலுவின் அரசியல் வளர்ச்சி தொடர்பாக விகடன், பிபிசி உள்ளிட்ட ஊடகங்கள் கட்டுரை வெளியிட்டிருந்தன. அதில், எ.வ.வேலு தமிழ் இலக்கியத்தில் பட்டம் பெற்றவர் என்றும், ஆரம்ப காலத்தில் பேருந்து நடத்துனராக பணியாற்றினார் என்றும் குறிப்பிடப்பட்டிருந்தது. மேலும். 1984ம் ஆண்டு நடந்த சட்டமன்ற தேர்தலில் அ.தி.மு.க சார்பில் தண்டராம்பட்டு தொகுதியில் போட்டியிட்டு வெற்றி பெற்றார் என்று குறிப்பிடப்பட்டிருந்தது. இதன் அடிப்படையில் 1984ம் ஆண்டு நடந்த சட்டமன்ற தேர்தலில் தண்டராம்பட்டு தொகுதி நிலவரம் தொடர்பாக இந்திய தேர்தல் ஆணையத்தின் இணையதளத்தில் இருந்து தகவலை தேடி எடுத்தோம். அதில் அதிமுக சார்பில் போட்டியிட்ட எ.வஜ்ஜிரவேலு (எ.வ.வேலு) வெற்றி பெற்றார் என்று குறிப்பிடப்பட்டிருந்தது.

உண்மைப் பதிவைக் காண: eci.gov.in 

தொடர்ந்து அந்த கட்டுரைகளை பார்த்த போது. எம்.ஜி.ஆர் மறைவுக்குப் பிறகு ஜானகி ஆணியில் எ.வ.வேலு சேர்ந்தார் என்றும் அதன் பிறகு பாக்கியராஜ் ஆரம்பித்த கட்சியில் கொள்கை பரப்புச் செயலாளராக இருந்தார் என்றும் ஜெயலிலலிதா தலைமையிலான அதிமுக-வில் இணைய முயற்சி செய்தார் என்றும் ஜானகி அணியைச் சார்ந்தவர் என்பதால் ஜெயலலிதா இவரை ஒதுக்கினார் என்றும் குறிப்பிடப்பட்டிருந்தது. 

2000ம் ஆண்டில் தி.மு.க-வில் இணைந்த அவர் 2001, 2006ம் ஆண்டுகளில் தண்டராம்பட்டு தொகுதியில் தி.மு.க சார்பில் போட்டியிட்டு வெற்றி பெற்றார் என்றும், அதன் பிறகு திருவண்ணாமலை தொகுதியில் இருந்து 2011, 2016, 2021 ஆகிய தேர்தல்களில் தேர்வு செய்யப்பட்டார் என்றும் குறிப்பிடப்பட்டிருந்தது.

நாம் ஆய்வுக்கு எடுத்துக்கொண்ட புகைப்படத்தை தி இந்து ஆங்கில நாளிதழ் வெளியிட்டுள்ளது. இந்த புகைப்படம் 1991ம் ஆண்டு மே மாதம் சட்டமன்ற தேர்தலின் போது எடுக்கப்பட்டது என்று தி இந்து தெரிவிக்கிறது. ஆனால், அதற்கு முன்னதாகவே எ.வ.வேலு எம்.எல்.ஏ-வாக தேர்வு செய்யப்பட்டுவிட்டார். 

1984ம் ஆண்டே ஒரு எம்.எல்.ஏ-வாக வேறு கட்சியில் இருந்தவர் எப்படி 10 ஆண்டுகள் கழித்து ரிக்‌ஷா ஓட்டியிருப்பார் என்ற கேள்வி எழுகிறது. மேலும் புகைப்படம் எடுக்கப்பட்ட 10 ஆண்டுகள் கழித்துதான் (2000) அவர் தி.மு.க-வில் இணைந்ததாகவும் குறிப்பிடப்பட்டுள்ளது. இவை எல்லாம் இந்த புகைப்படத்தில் இருப்பவர் எ.வ.வேலு இல்லை என்பதை உறுதி செய்கின்றன.

1991ல் மு.கருணாநிதி மேற்கொண்ட தேர்தல் பிரசார புகைப்படத்தை வைத்து, படத்தில் இருப்பவர் எ.வ.வேலு என்று விஷமத்தனமாக வதந்தி பரப்பியிருப்பதை தகுந்த ஆதாரங்கள் அடிப்படையில் உறுதி செய்துள்ளோம். இதன் அடிப்படையில் நாம் ஆய்வுக்கு எடுத்துக்கொண்ட பதிவு தவறானது என்று உறுதி செய்யப்படுகிறது.

முடிவு:

கருணாநிதிக்கு ரிக்‌ஷா ஓட்டிய எ.வ.வேலு இன்று அமைச்சராகி கோடீஸ்வரர் ஆகிவிட்டார் என்று பரவும் புகைப்படம் தவறானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel