கேரளாவில் பெண்களை தவறாக சித்தரித்து பரப்பிய பா.ஜ.க செயலாளருக்கு அடி என்று பரவும் தகவல் உண்மையா?

கேரளாவில் பெண்களை மார்பிங் செய்து சமூக ஊடகங்களில் பரப்பிய பா.ஜ.க கிளைச் செயலாளரைப் பெண்கள் அடித்தனர் என்று ஒரு வீடியோ சமூக ஊடகங்களில் வைரலாக பகிரப்பட்டு வருகிறது. இது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

ஆண் ஒருவரைப் பெண்கள் சுற்றித் தாக்குகின்றனர். காரில் உள்ளவர்களை அடிக்க முயற்சிக்கின்றனர். காரை உடைக்கின்றனர். மீண்டும் அந்த நபரை ஏராளமான பெண்கள் சூழ்ந்து தாக்கும் வீடியோ பகிரப்பட்டுள்ளது. காரில் உள்ளவர்கள் அலறும் சத்தம் கேட்கிறது. நிலைத் தகவலில், “கேரளா…* 🤔 பெண்களை மார்பிங் செய்து பரப்பிய பாஜக கிளைச் செயலாளரை பெண்கள் அடித்து நொறுக்கிய காட்சி” என்று குறிப்பிடப்பட்டுள்ளது. 

இந்த வீடியோவை Ias Sardaar என்ற ஃபேஸ்புக் ஐடி-யைக் கொண்டவர் 2023 ஜனவரி 19ம் தேதி பதிவிட்டுள்ளார். இவரைப் போல பலரும் இந்த வீடியோவை பகிர்ந்து வருகின்றனர்.

உண்மை அறிவோம்:

கேரளாவில் பெண்களை ஆபாசமாக சித்தரித்து சமூக ஊடகங்களில் பதிவிட்ட பா.ஜ.க நிர்வாகியை பெண்கள் தாக்கியதாக பகிரப்பட்டுள்ளது. இந்த தகவல் உண்மைதானா என்று அறிய ஆய்வு செய்தோம்.

முதலில் சில கீ வார்த்தைகளைப் பயன்படுத்தி கூகுளில் தேடினோம். அப்போது “மார்பிங் செய்த பதிவுகளை பரப்பியதாக கூறி ஆண் ஒருவரை தாக்கிய 11 பெண்கள் கைது செய்யப்பட்டனர்” என்ற செய்தி கிடைத்தது. அந்த செய்தியில் நாம் ஆய்வுக்கு எடுத்துக்கொண்ட வீடியோ காட்சி இருந்தது. அந்த செய்தியைப் பார்த்தோம். 

கேரள மாநிலம் திருச்சூரில் உள்ள எம்பரர் இம்மானுவேல் சபை என்ற கிறிஸ்தவ பிரிவைச் சேர்ந்த ஒருவர் பெண்களின் படங்களை மார்பிங் செய்து சமூக ஊடகங்களில் பரப்பியதாக கூறி அவரை அதே சபையைச் சார்ந்த பெண்கள் தாக்கினர்” என்று குறிப்பிட்டிருந்தனர். 

உண்மைப் பதிவைக் காண: onmanorama.com I Archive 1 I aninews.in I Archive 2

“குறிப்பிட்ட சபையிலிருந்து ஷாஜி வெளியேறிவிட்டார். சம்பவம் நடத்த போது, அவர் தேவாலயத்துக்கு சென்று கொண்டிருந்தார். அப்போது பெண்கள் சூழ்ந்து அவரை தாக்கினர். இது தொடர்பாக 11 பெண்கள் கைது செய்யப்பட்டு சிறையில் அடைக்கப்பட்டனர்” என்று அந்த செய்திகளில் குறிப்பிடப்பட்டிருந்தது. எந்த செய்தியிலும் தாக்கப்பட்ட நபர் பா.ஜ.க நிர்வாகி என்று குறிப்பிடவில்லை. 

கேரளாவில் இடதுசாரி, காங்கிரஸ் கட்சிக்கு ஆதரவு அதிகம். அந்த கட்சிகள் சார்பாக பல ஊடகங்கள் உள்ளன. அப்படி இருக்கும் போது பா.ஜ.க நிர்வாகி ஒருவர் பெண்களை ஆபாசமாக சித்தரித்து சமூக ஊடகங்களில் பதிவிட்டது தொடர்பாக தாக்கப்பட்டார் என்றால் அது பற்றி மிகப்பெரிய அளவில் செய்திகள் வெளியாகியிருக்கும். ஆனால், எந்த செய்தியிலும் தாக்கப்பட்ட நபர் பா.ஜ.க நிர்வாகி என்றோ, பா.ஜ.க உறுப்பினர் என்றோ குறிப்பிடாதது சந்தேகத்தை ஏற்படுத்தியது.

எனவே, இது குறித்து நம்முடைய ஃபேக்ட் கிரஸண்டோ மலையாளம் பிரிவின் உதவியை நாடினோம். அவர்கள், “மார்பிங் படத்தைப் பரப்பிய இஸ்லாமிய நபரை, இந்து பெண்கள் தாக்கினர் என்று சமூக ஊடகங்களில் வதந்தி பரவியது. இது தொடர்பாக நாங்கள் ஆய்வு செய்தோம். இந்த வழக்கை விசாரித்து வரும் ஆலூர் போலீஸ் நிலையத்தின் இன்ஸ்பெக்டர் எம்.பி.ஷிபினைத் தொடர்புகொண்டு பேசினோம். அப்போது அவர், ‘தாக்கப்பட்ட ஷாஜி கிறிஸ்தவ மதப் பிரிவைச் சார்ந்தவர். அவர் இஸ்லாமியர் இல்லை’ என்று கூறினார். அவரது அரசியல் பின்னணி பற்றியும் நாங்கள் அப்போது கேள்வி எழுப்பினோம். ‘அவர் எந்த கட்சியிலும் நிர்வாகியாக இல்லை, கட்சி பின்புலம் எதுவும் இல்லை’ என்று கூறினர்” என்றனர். ஃபேக்ட் கிரஸண்டோ ஆங்கிலத்தில் வெளியான கட்டுரையைக் காண இங்கே கிளிக் செய்யுங்கள்.

நாம் ஆய்வுக்கு எடுத்துக்கொண்ட வீடியோவில் தாக்கப்படும் நபரின் அரசியல் பின்புலம் குறித்துக் காவல் துறையிடம் விசாரித்து உறுதி செய்யப்பட்டுள்ளது. இதன் அடிப்படையில் கேரளாவில் பெண்களைத் தவறாகச் சித்தரித்து சமூக ஊடகங்களில் பதிவிட்ட பா.ஜ.க நிர்வாகியை பெண்கள் தாக்கினர் என்று பரவும் தகவல் உண்மையுடன் தவறான தகவலும் கலந்தது என்று உறுதி செய்யப்படுகிறது.

முடிவு:

கேரளாவில் பெண்களை மார்பிங் செய்து சமூக ஊடகங்களில் தவறாக பதிவிட்ட பா.ஜ.க கிளைச் செயலாளரை பெண்கள் தாக்கினார்கள் என்று பரவும் தகவல் தவறானது என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel