கிரிக்கெட் விளையாடிய மோடி என்று பரவும் வீடியோ உண்மையா?

பிரதமர் மோடி கிரிக்கெட் விளையாடினார் என்று ஒரு வீடியோ சமூக ஊடகங்களில் பகிரப்பட்டு வருகிறது. அது பற்றி ஆய்வு செய்தோம்.

தகவலின் விவரம்:

உண்மைப் பதிவைக் காண: Facebook I Archive

பிரதமர் மோடி கிரிக்கெட் விளையாடுவது போலவும், இந்திய டெஸ்ட் அணி சீருடையில் அவர் இருப்பது போலவும் புகைப்படம் மற்றும் வீடியோ பகிரப்பட்டுள்ளது. நிலைத் தகவலில், “இப்படி இந்த மனுசன் சகல விசயத்தையும் அறிந்து வைத்திருப்பது அருமை… தேர்ந்தெடுக்கப்பட்ட கிரிக்கெட் வீரரைப் போல் அற்புதமாக பேட்டிங் நளினம் மிக அருமை…. Super foot work …He is master in all” என்று குறிப்பிடப்பட்டிருந்தது.

இந்த வீடியோ பதிவை Vasanth Gutta என்ற ஃபேஸ்புக் ஐடி கொண்டவர் 2023 மார்ச் 13ம் தேதி பதிவிட்டுள்ளார். இவரைப் போல பலரும் இந்த வீடியோவை பகிர்ந்து வருகின்றனர்.

உண்மை அறிவோம்:

இந்தியா – ஆஸ்திரேலியா கிரிக்கெட் அணிகளுக்கு இடையேயான டெஸ்ட் கிரிக்கெட் போட்டி அகமதாபாத்தில் நடந்தது. இதில் முதல் நாள் தொடக்க நிகழ்ச்சியில் இந்திய மற்றும் ஆஸ்திரேலிய பிரதமர்கள் கலந்துகொண்டனர். இந்த சூழலில் பிரதமர் மோடி மிகச் சிறப்பாக கிரிக்கெட் விளையாடுகிறார். தேர்ந்தெடுக்கப்பட்ட கிரிக்கெட் வீரரைப் போல அற்புதமாக பேட்டிங் செய்கிறார் என்று பலரும் சமூக ஊடகங்களில் பகிர்ந்து வரவே இது பற்றி ஆய்வு செய்தோம்.

அகமதாபாத் கிரிக்கெட் போட்டியில் மோடி கிரிக்கெட் விளையாடிய காட்சியா இது என்று அறிய அந்த வீடியோவை தேடி எடுத்தோம். பிரதமர் நரேந்திர மோடியின் அதிகாரப்பூர்வ யூடியூப் பக்கத்தில் அந்த வீடியோ இருந்தது. அதில், பிரதமர் மோடி இந்திய டெஸ்ட் அணி சீருடையை அணியவில்லை என்பது தெரிந்தது. மேலும், அவர் கிரிக்கெட் பேட் பிடித்து விளையாடவும் இல்லை. தேசிய கீதம் இசைக்கப்பட்டதும் ஆஸ்திரேலிய வீரர்களுடன் கைக்குளுக்கிவிட்டு மைதானத்தை விட்டு வெளியேறுவதைக் காண முடிந்தது.

வீடியோவில் இருக்கும் நபரைப் பார்க்க மோடி போலவே உள்ளது. ஆனால், அவர் முகத்தைக் காட்டவில்லை. எனவே, அவர் யார் என்று அறிய வீடியோ காட்சிகளை புகைப்படங்களாக மாற்றி கூகுள் ரிவர்ஸ் இமேஜ் தேடலில் பதிவேற்றித் தேடினோம். அப்போது, அந்த நபர் பிரபல கிரிக்கெட் வீரர் யுவராஜ் சிங்கின் தந்தை யோக்ராஜ் சிங் என்பது தெரிந்தது.

உண்மைப் பதிவைக் காண: instagram.com

யோக்ராஜ் சிங் ப்ரீமியர் லீக் என்ற இன்ஸ்டாகிராம் பக்கத்தில் இந்த வீடியோ பதிவேற்றம் செய்யப்பட்டிருந்தது. அதே நேரத்தில் பிரபல இந்திய கிரிக்கெட் வீரர் யுவராஜ் சிங் டேக் செய்யப்பட்டிருந்தார். எனவே, யோக்ராஜ் சிங் யார் என்று தேடிய போது அவர் யுவராஜ் சிங்கின் தந்தை என்பது தெரியவந்தது. அவர் தற்போது கிரிக்கெட் பயிற்சி அளித்து வருகிறார். அந்த வீடியோக்களை அவர் தன்னுடைய சமூக ஊடக பக்கங்களில் பதிவிட்டு வருகிறார். அந்த படத்தை எடுத்து, மோடி கிரிக்கெட் விளையாடினார் என்று தவறாகப் பகிர்ந்திருப்பது தெளிவானது.

முடிவு:

தேர்ந்த சிறந்த கிரிக்கெட் வீரர் போல கிரிக்கெட் விளையாடும் நரேந்திர மோடி என்று பரவும் வீடியோவில் இருப்பது யுவராஜ் சிங்கின் அப்பா என்பதை தகுந்த ஆதாரங்கள் அடிப்படையில் ஃபேக்ட் கிரஸண்டோ தமிழ் உறுதி செய்துள்ளது. எனவே, நமது வாசகர்கள், இத்தகைய தவறான செய்தி, புகைப்படங்கள், வீடியோ போன்றவற்றை உறுதி செய்யாமல் மற்றவர்களுக்குப் பகிர வேண்டாம் என கேட்டுக் கொள்கிறோம். வாசகர்கள் தங்களுக்கு சந்தேகம் என்று தோன்றும் தகவல், பதிவு, புகைப்படம், வீடியோவை எங்களது வாட்ஸ் ஆப் எண்ணிற்கு (+91 9049053770) அனுப்பினால், அதுபற்றி ஆய்வு செய்து உண்மை விவரத்தை வெளியிடுகிறோம்.

சமூக ஊடகங்களில் எங்களை பின் தொடர விரும்பினால்…

Facebook I Twitter I Google News Channel